{"id":105725,"date":"2025-02-25T12:27:44","date_gmt":"2025-02-25T12:27:44","guid":{"rendered":"https:\/\/rdnews.al\/?p=105725"},"modified":"2025-02-25T12:28:09","modified_gmt":"2025-02-25T12:28:09","slug":"nuk-frikeson-me-tregon-friken-qe-e-ka-vete","status":"publish","type":"post","link":"https:\/\/rdnews.al\/index.php\/2025\/02\/25\/nuk-frikeson-me-tregon-friken-qe-e-ka-vete\/","title":{"rendered":"Nuk frik\u00ebson m\u00eb, tregon frik\u00ebn q\u00eb e ka vet\u00eb…"},"content":{"rendered":"

Nga Ervin SALIANJI<\/strong><\/p>\n

P\u00ebr ata q\u00eb jan\u00eb pasionant\u00eb ose hulumtues n\u00eb psikologji, dit\u00ebt e fundit Kryeministri \u00ebsht\u00eb vetofruar si kazus, ku dallohen luhatjet e forta t\u00eb humorit dhe gjendja e paq\u00ebndrueshme emocionale. Nervozizmi i thell\u00eb ka dal\u00eb n\u00eb sip\u00ebrfaqe p\u00ebrmes gjuh\u00ebs pa filtra, duke treguar disa t\u00eb v\u00ebrteta q\u00eb n\u00eb rastin e Edi Ram\u00ebs, kthehen n\u00eb aksione kur njeh pushtetin q\u00eb ka e strukturat q\u00eb urdh\u00ebron.<\/p>\n

Mjafton t\u00eb mallkoj\u00eb ai SPAK-un, dhe dhjet\u00ebra punonj\u00ebs e rrethojn\u00eb godin\u00ebn e makinat e funksionar\u00ebve.<\/p>\n

Hedh helm ai ndaj kund\u00ebrshtar\u00ebve dhe drejt\u00ebsia vepron mbi ta.<\/p>\n

Pra gjithkush e di q\u00eb retorika e tij, materializohet n\u00eb akte konkrete.<\/p>\n

S\u00eb fundmi, nga d\u00ebshp\u00ebrimi pasi toka i \u00ebsht\u00eb l\u00ebkundur shum\u00eb, Kryeministri l\u00ebshoi dy tre fjali, p\u00ebr t\u00eb cilat, n\u00eb kushte normale do t\u00eb duhej t\u00eb mbante p\u00ebrgjegj\u00ebsi.<\/p>\n

Duke th\u00ebn\u00eb se 11 maji do t\u00eb jet\u00eb \u201ct\u00ebrmet nga posht\u00eb dhe flak\u00eb nga lart\u201d, ai urdh\u00ebroi gjith\u00eb strukturat q\u00eb ka n\u00eb var\u00ebsi, dhe gjith\u00eb segmentet q\u00eb kontrollon, p\u00ebrfshir\u00eb dhe bandat, q\u00eb t\u00eb nisin pun\u00ebn p\u00ebr rezultatin q\u00eb ai d\u00ebshiron.<\/p>\n

Pra, Edi Rama l\u00ebshoi fermanin p\u00ebr vrasjen e zgjedhjeve. Problemi \u00ebsht\u00eb se n\u00eb qytet shum\u00eb ndryshime po ndihen. Drejtuesi i fushat\u00ebs p\u00ebr Opozit\u00ebn, \u00ebsht\u00eb Chris LaCivita, nj\u00eb nga bashk\u00ebpun\u00ebtor\u00ebt m\u00eb t\u00eb ngusht\u00eb t\u00eb Presidentit, Donald Trump. Ai ka b\u00ebr\u00eb disa pohime t\u00eb forta. Por nj\u00eb nga m\u00eb kryesoret, mendoj se \u00ebsht\u00eb q\u00eb; Do t\u00eb ket\u00eb zgjedhje t\u00eb lira e t\u00eb paprekura.<\/p>\n

Ky \u00ebsht\u00eb nj\u00eb nga qendrimet m\u00eb t\u00eb forta kund\u00ebr Edi Ram\u00ebs n\u00eb gjith\u00eb k\u00ebto vite. Dihet mir\u00eb se zgjedhjet e lira, t\u00eb ndershme dhe t\u00eb paprekura, jan\u00eb fundi i tij.<\/p>\n

Dhe p\u00ebr t\u00eb shmangur k\u00ebt\u00eb fund, ai nxori dekretin e \u201ct\u00ebrmet nga posht\u00eb, e flak\u00eb nga lart\u201d.<\/p>\n

Kemi pra nj\u00eb kryeminist\u00ebr q\u00eb nxit kapjen e vot\u00ebs, prekjen, deformimin e vullnetit t\u00eb qytetar\u00ebve. Haptazi fare.<\/p>\n

M\u00eb e renda, n\u00ebse e interpreton drejt dhe pa shum\u00eb mund, me nj\u00eb q\u00ebndrim si ky, Edi Rama po thot\u00eb se n\u00ebse ai nuk fiton, pra n\u00ebse nga kutit\u00eb e 11 majit nuk del ajo q\u00eb ai d\u00ebshiron, do t\u00eb ket\u00eb t\u00ebrmet e flak\u00eb, pra do t\u00eb ket\u00eb luft\u00eb.<\/p>\n

M\u00eb i pap\u00ebrgjegjsh\u00ebm, dhe m\u00eb antiligjor, e anti-kushtetues se kaq, nuk ka se si t\u00eb jet\u00eb nj\u00eb Kryeminist\u00ebr.<\/p>\n

Dihet mir\u00eb se deviza 12 vje\u00e7are e Ram\u00ebs ka q\u00ebn\u00eb sundimi mbi frik\u00ebn, dhe jo qeverisja mbi besimin. K\u00ebt\u00eb po tenton t\u00eb b\u00ebj\u00eb edhe n\u00eb muajt e fundit.<\/p>\n

Vet\u00ebm se tanim\u00eb ka nj\u00eb ndryshim. Ai nuk arrin m\u00eb t\u00eb ndjell\u00eb frik\u00eb, por sa m\u00eb shum\u00eb l\u00ebshon t\u00eb tilla logore, aq m\u00eb shum\u00eb d\u00ebfton frik\u00ebn q\u00eb ka kapluar at\u00eb vet\u00eb.<\/p>\n

Koraca q\u00eb e bent\u00eb t\u00eb pushtetsh\u00ebm, q\u00eb ndihmonte sundimin e tij ka r\u00ebn\u00eb. Sherifi i ri n\u00eb qytet, nuk ka ardhur t\u00eb jap\u00eb dekorata, e as t\u00eb mbyll\u00eb syt\u00eb para nj\u00eb regjimi.<\/p>\n

Njeriu i Trump n\u00eb Tiran\u00eb, \u00ebsht\u00eb b\u00ebr\u00eb menj\u00ebher\u00eb p\u00ebrfaq\u00ebsues i interesit publik, p\u00ebrfaq\u00ebsues i interesave t\u00eb vendit. Sepse Shqip\u00ebria e ka jetike q\u00eb t\u00eb b\u00ebj\u00eb zgjedhje t\u00eb lira e t\u00eb ndershme, e ka jetike sa ujin dhe diellin, sa ajrin.<\/p>\n

Vet\u00ebm me vot\u00eb t\u00eb paprekur do t\u00eb shkojn\u00eb n\u00eb vend prap\u00ebsit\u00eb e paudh\u00ebsit\u00eb e panum\u00ebrta q\u00eb jan\u00eb b\u00ebr\u00eb kapic\u00eb n\u00eb 3 mandate. Vet\u00ebm vota e lir\u00eb dhe e ndershme e ka k\u00ebt\u00eb aft\u00ebsi korigjuese.<\/p>\n

K\u00ebshtu q\u00eb, ende pa nisur mir\u00eb pun\u00ebn, strategu i Trump ka ndihmuar jo vet\u00ebm demokrat\u00ebt, por Shqip\u00ebrin\u00eb.<\/p>\n

Dhe \u00ebsht\u00eb po aq n\u00eb interesin e vendit, n\u00eb interesin madhor t\u00eb ecjes drejt integrimit dhe shp\u00ebtimit nga r\u00ebnia n\u00eb humner\u00eb, q\u00ebndrimi tjet\u00ebr i tij, q\u00eb d\u00ebnon p\u00ebrndjekjen e burgosjen e kund\u00ebrshtar\u00ebve. Nj\u00eb tez\u00eb e fort\u00eb mesa duket e Sht\u00ebpis\u00eb s\u00eb Bardh\u00eb, duke qen\u00eb se at\u00eb \u00e7ka Chris LaCivita e than\u00eb Rogner, e theksoi Zv-Presidenti Vance n\u00eb konferenc\u00ebn e Mynihut.<\/p>\n

Presioni p\u00ebr vot\u00ebn e lir\u00eb, e p\u00ebr t\u00eb zbatuar normat baz\u00eb t\u00eb demokracis\u00eb, kan\u00eb nxjerr\u00eb nga binar\u00ebt Kryeministrin e vendit. Dhe nuk \u00ebsht\u00eb pak p\u00ebr t\u00eb. Se Edi Rama ka shum\u00eb hesape p\u00ebr t\u00eb lar\u00eb, ka shum\u00eb llogari p\u00ebr t\u00eb dh\u00ebn\u00eb. E pret nj\u00eb rrug\u00eb e gjat\u00eb dhe e mundimshme pas 12 majit. Normal q\u00eb ka frik\u00eb. B\u00ebn mir\u00eb t\u00eb ket\u00eb frik\u00eb.<\/p>\n