{"id":115473,"date":"2025-05-31T09:54:23","date_gmt":"2025-05-31T09:54:23","guid":{"rendered":"https:\/\/rdnews.al\/?p=115473"},"modified":"2025-05-31T09:54:23","modified_gmt":"2025-05-31T09:54:23","slug":"percarja-ps-psd-loje-politike-sa-per-fushate","status":"publish","type":"post","link":"https:\/\/rdnews.al\/index.php\/2025\/05\/31\/percarja-ps-psd-loje-politike-sa-per-fushate\/","title":{"rendered":"P\u00ebr\u00e7arja PS-PSD? Loj\u00eb politike sa p\u00ebr fushat\u00eb\u2026"},"content":{"rendered":"

Nga Eliona Kodra SHKRELI<\/strong><\/p>\n

Ja pra dhe e v\u00ebrteta e madhe\u2026.<\/p>\n

Gjat\u00eb fushat\u00ebs elektorale, n\u00eb nj\u00eb emision televiziv e deklarova se PS-PSD jan\u00eb bashk\u00eb sepse kan\u00eb interesa t\u00eb p\u00ebrbashk\u00ebta!<\/p>\n

Politika v\u00ebrtet\u00eb \u00ebsht\u00eb ndonj\u00ebher\u00eb loj\u00eb marr\u00ebveshjesh por kurrsesi nuk duhet t\u00eb jet\u00eb nj\u00eb loj\u00eb e \u2018ndyr\u00eb\u2019 p\u00ebr t\u00eb \u00e7oroditur elektoratin dhe mes \u00e7oroditjes e manipulimit t\u00eb mundohesh t\u00eb marr\u00ebsh qoft\u00eb dhe nj\u00eb vot\u00eb plus.<\/p>\n

Gjat\u00eb fushat\u00ebs elektorale pam\u00eb nj\u00eb loj\u00eb t\u00eb sh\u00ebmtuar mes k\u00ebtyre dy forcave politike t\u00eb cilat idealet i kan\u00eb t\u00eb nj\u00ebjta\u2026.vjedhje t\u00eb taksave t\u00eb qytetar\u00ebve, buxhetit t\u00eb shtetit dhe pasurim vetjak! Pam\u00eb akuza ndaj nj\u00ebri tjetrit, madje deri aty sa PSD, p\u00ebrmes kreut t\u00eb saj, deklaroi se nuk do bashk\u00ebpunoj\u00eb kurr\u00eb me Benet Becin duke rreshtuar nj\u00eb s\u00ebr\u00eb akuzash t\u00eb r\u00ebnda korruptive ndaj tij, t\u00eb cilat n\u00eb fakt p\u00ebr qytetar\u00ebt dhe elektoratin nuk ishin t\u00eb reja.<\/p>\n

Lumi i akuzave vijoi rrjedh\u00ebn e tij duke u derdhur kushedi se ku\u2026.u deklaruan shum\u00eb t\u00eb v\u00ebrteta t\u00eb abuzimit p\u00ebrmes tenderave korruptiv\u00eb por menj\u00ebher\u00eb pas daljes s\u00eb rezultatit t\u00eb zgjedhjeve Beci u b\u00eb s\u00ebrish i mir\u00eb dhe i past\u00ebr nga \u00e7do korrupsion deri aty sa p\u00ebrfaq\u00ebsuesit e PSD-s\u00eb n\u00eb K\u00ebshillin Bashkiak t\u00eb Shkodr\u00ebs dol\u00ebn n\u00eb nj\u00eb deklarat\u00eb t\u00eb qeshur e t\u00eb lumtur duke \u201clidhur bes\u00ebn\u201d s\u00ebrish n\u00eb mb\u00ebshtetje t\u00eb PS-s\u00eb e si rrjedhoj\u00eb edhe t\u00eb k\u00ebtij Becit t\u00eb krimit e t\u00eb korrupsionit (si\u00e7 vet\u00eb lideri i PSD e etiketoi gjat\u00eb fushat\u00ebs elektorale).<\/p>\n

Nuk b\u00ebn\u00eb asgj\u00eb tjet\u00ebr p\u00ebrve\u00e7se luajt\u00ebn nj\u00eb teat\u00ebr politik (si gjithmon\u00eb) t\u00eb dal\u00eb boje tashm\u00eb, ku me urdh\u00ebr t\u00eb drejtuesit politik Beci u shkarkuan shum\u00eb drejtor\u00eb e punonj\u00ebs t\u00eb PSD-s\u00eb e menj\u00ebher\u00eb m\u00eb pas, PSD \u2018mori masat\u2019 p\u00ebr t\u2019u hakmarr\u00eb e p\u00ebr t\u00eb \u201ctreguar dh\u00ebmb\u00ebt\u201d duke bllokuar (medemek) projekt-vendimet e Becit n\u00eb K\u00ebshillin Bashkiak deri pas 11 majit. Por e gjitha ishte vet\u00ebm nj\u00eb fars\u00eb mashtrimi p\u00ebr t\u00eb krijuar polemikat tek qytetar\u00ebt dhe votuesit rreth gjoja \u2018ndarjes\u2019 Rama-Doshi dhe Beci-Doshi, nj\u00eb fars\u00eb elektorale ku secili shprehte \u201cndershm\u00ebrin\u00eb\u201d ndaj votuesve.<\/p>\n

PS-PSD kan\u00eb q\u00ebn\u00eb dhe jan\u00eb gjithmon\u00eb bashk\u00eb, sepse ndajn\u00eb interesa t\u00eb p\u00ebrbashk\u00ebta. Nd\u00ebrkoh\u00eb q\u00eb t\u00eb dyja pal\u00ebt flasin n\u00eb em\u00ebr t\u00eb interesit t\u00eb qytetarit, n\u00eb fakt ata i lidh bashk\u00eb vet\u00ebm interesi i pazareve dhe qytetari \u00ebsht\u00eb p\u00ebr ta vet\u00ebm p\u00ebr t\u2019a mashtruar me lug\u00eb bosh, me premtime e fasada q\u00eb nuk realizohen kurr\u00eb. Qytetarit i ofrojn\u00eb n\u00eb k\u00ebmbim rritje t\u00eb \u00e7mimeve dhe tkurrje t\u00eb ekonomis\u00eb familjare dhe individuale p\u00ebr t\u2019a l\u00ebn\u00eb t\u00eb braktisur n\u00eb kufinjt\u00eb e mbijetes\u00ebs ose p\u00ebr t\u2019a larguar p\u00ebrfundimisht nga ky v\u00ebnd n\u00eb k\u00ebrkim t\u00eb shpres\u00ebs n\u00eb nj\u00eb shtet tjet\u00ebr.<\/p>\n

Rama-Doshi po qeverisin prej 12 vitesh, duke u b\u00ebr\u00eb paterica e nj\u00ebri-tjetrit n\u00eb shum\u00eb raste. Pavar\u00ebsisht se PSD nuk ka patur nj\u00eb karrige t\u00eb z\u00ebn\u00eb n\u00eb qeverin\u00eb Rama, ka bashk\u00ebqeverisur n\u00eb fsheht\u00ebsi p\u00ebrmes pazareve, vet\u00ebm e vet\u00ebm p\u00ebr t\u00eb mbajtur pushtetin, secili n\u00eb \u201chabitatin\u201d e vet.<\/p>\n

Rama-Doshi jan\u00eb dyshe e pandashme pasi i lidhin t\u00eb nj\u00ebjtat interesa, p\u00ebrfitimi personal dhe mbajtja e pushtetit me \u00e7do kusht p\u00ebr t\u00eb bashk\u00ebndar\u00eb t\u00eb mirat monetare q\u00eb pushteti jep. Ata nuk ndahen kurr\u00eb, pa\u00e7ka atyre \u00e7ka thon\u00eb e deklarojn\u00eb. Pavar\u00ebsisht se n\u00eb fushata elektorale luajn\u00eb loj\u00ebn e maces me miun, ata nuk ndahen kurr\u00eb sepse p\u00ebrfaq\u00ebsojn\u00eb dy parti q\u00eb n\u00eb fakt idealet i kan\u00eb t\u00eb nj\u00ebjta.<\/p>\n

Atyre nuk i intereson fare as Shkodra, as e mira e qytetar\u00ebve shkodran\u00eb e shqiptar\u00eb, atyre u intereson vet\u00ebm mbajtja e pushtetit me \u00e7do \u00e7mim, e p\u00ebr aq koh\u00eb sa organet e ligjit nuk do veprojn\u00eb, ata do jen\u00eb bashk\u00eb, duke mb\u00ebshtetur nj\u00ebri-tjetrin fort p\u00ebr hir t\u00eb pazareve e marr\u00ebveshjeve korruptive. Nd\u00ebrsa \u201cdivorcet\u201d gjat\u00eb fushat\u00ebs dhe \u201crimartesat\u201d pas zgjedhjeve, jan\u00eb thjesht nj\u00eb show p\u00ebr t\u00eb mashtruar shqiptar\u00ebt, nj\u00eb loj\u00eb e cila po p\u00ebrs\u00ebritet n\u00eb disa zgjedhje duke u kthyer n\u00eb veprime t\u00eb pabesueshme dhe qesharake!<\/p>\n

Qytetar\u00ebt shkodran\u00eb nuk harrojn\u00eb se si n\u00eb dy buxhetet Beci, p\u00ebrfaq\u00ebsuesit k\u00ebshilltar\u00eb t\u00eb PSD-s\u00eb n\u00eb K\u00ebshillin Bashkiak, votuan n\u00eb rresht n\u00eb mb\u00ebshtetje t\u00eb plot\u00eb buxhetet e turpit, miliona euro t\u00eb cilat ndahen mes pal\u00ebve p\u00ebr t\u2019i mbyllur goj\u00ebn gjithsecilit. Shkodra nuk harron se k\u00ebshilltar\u00ebt e PSD-s\u00eb kan\u00eb bashkuar votat p\u00ebr t\u00eb miratuar interesat hajdute e Becit p\u00ebrmes projekt-vendimeve, sigurisht n\u00eb k\u00ebmbim t\u00eb p\u00ebrfitimeve korruptive t\u00eb cilat i din\u00eb vet\u00ebm ata.<\/p>\n