{"id":123704,"date":"2025-09-19T19:07:03","date_gmt":"2025-09-19T19:07:03","guid":{"rendered":"https:\/\/rdnews.al\/?p=123704"},"modified":"2025-09-19T19:50:10","modified_gmt":"2025-09-19T19:50:10","slug":"kushtoi-410-milion-leke-si-rama-pergenjeshtroi-veten-per-parkun-eden-te-kryeministria","status":"publish","type":"post","link":"https:\/\/rdnews.al\/index.php\/2025\/09\/19\/kushtoi-410-milion-leke-si-rama-pergenjeshtroi-veten-per-parkun-eden-te-kryeministria\/","title":{"rendered":"Kushtoi 410 milion lek\u00eb\/ Si Edi Rama p\u00ebrg\u00ebnjeshtroi veten p\u00ebr \u201cParkun Eden\u201d te Kryeministria"},"content":{"rendered":"

Tre vite pasi mohonte shpenzimet, Rama flet p\u00ebr investim shtet\u00ebror n\u00eb oborrin e Kryeministris\u00eb.<\/strong><\/em><\/p>\n

N\u00eb shtator t\u00eb vitit 2022 Shqip\u00ebria ndodhej n\u00eb kulmin e kriz\u00ebs energjetike. Qeveria kishte shpallur emergjenc\u00ebn dhe qytetar\u00ebt p\u00ebrballeshin me paralajm\u00ebrime p\u00ebr rritje t\u00eb faturave t\u00eb energjis\u00eb.<\/p>\n

N\u00eb t\u00eb nj\u00ebjt\u00ebn koh\u00eb, kryeministri Edi Rama i kishte hapur rrug\u00ebn nj\u00eb projekti prej 410 milion\u00eb lek\u00ebsh n\u00eb oborrin e Kryeministris\u00eb: \u201cParkut Eden\u201d.<\/p>\n

Vendimi ndezi debat publik dhe shkaktoi nj\u00eb lum\u00eb akuzash nga opozita. Rama u p\u00ebrpoq ta shuante polemik\u00ebn duke mohuar kategorikisht se qeveria kishte shpenzuar para p\u00ebr k\u00ebt\u00eb instalacion.<\/p>\n

Por tre vite m\u00eb von\u00eb, kryeministri ndryshoi q\u00ebndrim.<\/p>\n

\n
\n
\n
<\/div>\n
N\u00eb nj\u00eb intervist\u00eb<\/a>\u00a0p\u00ebr gazetarin Blendi Fevziu, ai pranoi se nd\u00ebrtimi i \u201cParkut Eden\u201d ishte nj\u00eb \u201cinvestim shtet\u00ebror\u201d. Pa p\u00ebrmendur shifra konkrete, Rama u kujdes t\u00eb theksonte se \u201cshpenzimet ishin t\u00eb pap\u00ebrfillshme krahasuar me vler\u00ebn e shtuar q\u00eb krijojn\u00eb\u201d<\/div>\n<\/div>\n<\/div>\n<\/div>\n

\u201cKy nuk \u00ebsht\u00eb oborri i sht\u00ebpis\u00eb time, \u00ebsht\u00eb nj\u00eb park inovativ i cili do t\u2019i sh\u00ebrbej\u00eb t\u00eb gjith\u00eb kryeministrave m\u00eb pas dhe do t\u00eb jet\u00eb nj\u00eb vler\u00eb e k\u00ebsaj godine, shum\u00eb e shtuar\u201d,\u00a0<\/em>deklaroi<\/a>\u00a0ai.<\/p>\n

Kjo deklarat\u00eb bie ndesh me q\u00ebndrimin e tij t\u00eb shtatorit 2022.<\/p>\n

\u201cQeveria nuk ka shpenzuar asnj\u00eb qindark\u00eb p\u00ebr asnj\u00eb lloj instalacioni n\u00eb mjediset e K\u00ebshillit t\u00eb Ministrave,\u201d<\/em>\u00a0\u00a0shprehej<\/a>\u00a0Rama.<\/p>\n

N\u00ebse at\u00ebher\u00eb \u201cParku Eden\u201d ishte nj\u00eb shpenzim i mohuar, n\u00eb vitin 2025 \u00ebsht\u00eb shnd\u00ebrruar n\u00eb simbol krenarie p\u00ebr Kryeministrin.<\/p>\n

Si duket sot \u2018Parku Eden\u2019?<\/strong><\/h4>\n

P\u00ebr her\u00eb t\u00eb par\u00eb,\u00a0pamjet<\/a>\u00a0e \u201cParkut Eden\u201d u publikuan k\u00ebt\u00eb fillimviti nga vet\u00eb kryeministri Edi Rama. Ai zgjodhi q\u00eb urimin p\u00ebr Vitin e Ri 2025 ta p\u00ebrcillte nga instalacioni prej druri i nd\u00ebrtuar n\u00eb oborrin e Kryeministris\u00eb, i cili ishte pjes\u00ebrisht i p\u00ebrfunduar.<\/p>\n

N\u00eb videon e shp\u00ebrndar\u00eb nga Rama, kamera ndjek kryeministrin teksa p\u00ebrshkon hap\u00ebsirat e reja. Pamjet nisin me akuariumin q\u00eb rrethon struktur\u00ebn vertikale prej druri, ku shfaqen peshq t\u00eb shumt\u00eb. M\u00eb pas, Rama ngjitet n\u00eb \u00e7do kat t\u00eb parkut duke treguar ambientet e mbushura me gjelb\u00ebrim, lule dhe pem\u00eb t\u00eb vendosura n\u00eb m\u00ebnyr\u00eb dekorative.<\/p>\n

N\u00eb fund t\u00eb videos, kryeministri ngjitet shkall\u00ebve spirale q\u00eb \u00e7ojn\u00eb n\u00eb tarrac\u00eb, nga ku ofrohet nj\u00eb panoram\u00eb mbi Tiran\u00ebn, p\u00ebrpara se t\u00eb zbres\u00eb s\u00ebrish dhe t\u00eb jap\u00eb urimin p\u00ebr shqiptar\u00ebt.<\/p>\n

\u2018Parku Eden\u2019 u inagurua n\u00eb muajin qershor.<\/p>\n