{"id":158665,"date":"2026-10-24T18:38:05","date_gmt":"2026-10-24T18:38:05","guid":{"rendered":"https:\/\/rdnews.al\/?p=158665"},"modified":"2026-10-24T18:38:05","modified_gmt":"2026-10-24T18:38:05","slug":"mos-e-lini-piktorin-ta-djege-shqiperine-dhe-ta-deboje-edhe-ate-pak-rini-qe-i-ka-mbetur","status":"publish","type":"post","link":"https:\/\/rdnews.al\/index.php\/2026\/10\/24\/mos-e-lini-piktorin-ta-djege-shqiperine-dhe-ta-deboje-edhe-ate-pak-rini-qe-i-ka-mbetur\/","title":{"rendered":"Mos e lini piktorin ta djeg\u00eb Shqip\u00ebrin\u00eb dhe ta d\u00ebboj\u00eb edhe at\u00eb pak rini q\u00eb i ka mbetur!"},"content":{"rendered":"

Nga Kim Mehmeti<\/a><\/p>\n

Piktori e ka kuptuar se i ka mbetur vet\u00ebm edhe nj\u00eb rrug\u00eb p\u00ebr ta mbuluar fytyr\u00ebn e vet t\u00eb tradhtarit: ta djeg\u00eb Shqip\u00ebrin\u00eb dhe ta d\u00ebboj\u00eb prej saj edhe at\u00eb pak rini q\u00eb ka mbetur, n\u00eb m\u00ebnyr\u00eb q\u00eb t\u00eb mos ket\u00eb m\u00eb kush t\u2019i k\u00ebrkoj\u00eb llogari p\u00ebr shkat\u00ebrrimin e m\u00ebm\u00ebdheut dhe shnd\u00ebrrimin e tij n\u00eb nj\u00eb narko-shtet.<\/p>\n

Piktori pra e ka kuptuar se fytyr\u00ebn e tij t\u00eb v\u00ebrtet\u00eb, at\u00eb t\u00eb rr\u00ebnuesit t\u00eb Shqip\u00ebris\u00eb, mund ta mbuloj\u00eb vet\u00ebm tymi i gazit lotsjell\u00ebs dhe i vendit t\u00eb djegur.<\/p>\n

Ai beson pra se n\u00eb nj\u00eb Shqip\u00ebri t\u00eb djegur dhe t\u00eb mbetur vet\u00ebm me pleq e plaka, pa rini dhe pa shpres\u00eb, akush nuk do ta rrezikoj\u00eb \u2018Aleanc\u00ebn e tij t\u00eb Qelb\u00ebsirave\u2019.<\/p>\n

Dhe Piktori mbase drejt\u00eb e ka vler\u00ebsuar se prind\u00ebrit e k\u00ebtyre t\u00eb rinjve t\u00eb guximsh\u00ebm, t\u00eb cil\u00ebt po ia kthejn\u00eb krenarin\u00eb dhe dinjitetin shqiptar\u00ebsis\u00eb, jan\u00eb pajtuar t\u00eb p\u00ebrjetojn\u00eb edhe nj\u00eb d\u00ebshtim t\u00eb turpsh\u00ebm si ai I 1990 kur b\u00ebnin sikur nuk e shihnin se, me r\u00ebnien e Partis\u00eb s\u00eb Pun\u00ebs, nuk po binte komunizmi; t\u00eb shtiren edhe sot q\u00eb nuk e shohin se, n\u00ebse d\u00ebshtojn\u00eb k\u00ebto protesta, do t\u00eb bjer\u00eb Shqip\u00ebria.<\/p>\n

Nd\u00ebrkoh\u00eb, Piktori, ashtu si\u00e7 arriti ta mbuloj\u00eb hajdutokracin\u00eb e tij me petkun proper\u00ebndimor dhe proevropian, p\u00ebrpiqet q\u00eb k\u00ebto protesta kund\u00ebr narko-shtetit t\u00eb tij t\u2019i barazoj\u00eb me protestat n\u00eb vendet per\u00ebndimore, ku protestuesve askush nuk ua v\u00ebn\u00eb n\u00eb rrezik shtetin dhe t\u00eb ardhmen e atdheut t\u00eb tyre.<\/p>\n

Dhe, n\u00eb nj\u00eb Shqip\u00ebri ku institucionet jan\u00eb v\u00ebn\u00eb n\u00eb sh\u00ebrbim t\u00eb krimit, mbetet e paqart\u00eb se si prind\u00ebrit e k\u00ebtyre f\u00ebmij\u00ebve t\u00eb guximsh\u00ebm, q\u00eb po protestojn\u00eb, nuk e kuptojn\u00eb se n\u00ebse k\u00ebta t\u00eb rinj nuk do t\u00eb ken\u00eb m\u00eb rrug\u00ebdalje tjet\u00ebr, p\u00ebrve\u00e7se t\u00eb ulen e t\u00eb bisedojn\u00eb me Piktorin, ata n\u00eb t\u00eb v\u00ebrtet\u00eb do pajtohen t\u00eb mbeten pa atdhe dhe t\u2019i b\u00ebjn\u00eb gati valixhet p\u00ebr ta braktisur vendlindjen.<\/p>\n

Por kuptohet, kjo rini nuk guxon t\u00eb d\u00ebshtoj\u00eb, ajo p\u00ebrfundimisht duhet ta rr\u00ebzoj\u00eb komunizmin dhe t\u2019u tregoj\u00eb prinpd\u00ebrve t\u00eb vet se \u00e7ka i dallon diktaturat p\u00ebrbuz\u00ebse n\u00eb t\u00eb cilat ata jetuan t\u00eb heshtur – at\u00eb t\u00eb Partis\u00eb s\u00eb Pun\u00ebs dhe k\u00ebt\u00eb t\u00eb bij\u00ebs s\u00eb saj – Partis\u00eb Socialiste: Enveri t\u00eb vriste, por nuk t\u00eb linte pa atdhe, nd\u00ebrsa Piktori t\u00eb l\u00eb gjall\u00eb, por ta djeg, ta shet Shqip\u00ebrin\u00eb dhe t\u00eb l\u00eb pa atdhe!<\/p>\n