Ramaduro apo Rama duro?

Nga Ylli DYLGJERI

Mendoj se pas shkrimit të Neshos në Fox News, Rama duhet të bënte kujdes, të heshte, të duronte pak!

Të duronte e të bëhej më i djallëzuar, të bëhej dhelpër (Fox), e jo News! Rama mirë do ishte të parandalonte e qetësonte shpërthimet e patronazhistëve, të militantëve, të ish sigurimsave, të ish bllokmenëve, të ish prokurorëve në pension, të bashkëpuntorëve të djeshëm, të injorantëve që gumëzhinë në kafene dhe trotuaret e vendit, e jo të shpërndante pseudonews-e. Të nxiste investitorët strategjikë në mediat vasale që të tregoheshin inteligjentë. Sepse nuk e prishi Nesho imazhin e vëndit. Imazhi ka mbi 13 vite që prishet e shkërmoqet nga bandat e krimi i organizuar.

Nuk prishet veza e prishur!

Imazhi është prishur nga Ministrat e Drejtorët, nga deputet dhe horrat në Bashkitë e Shqipërisë. Imazhi sot nuk futet në thes. Imazhi sot është i ngritur me kate, në kulla shumëkatëshe ku pastrohen paratë, e më pas bëhet Casino e Resorte turistike. Imazhi sot është i arrestuar në burgje e tëre vëndit. Imazhi sot është mbjellë canabis fushave të vendit. Imazhi sot është kokainë që hyn e del në Portin e Durrësit etj.Imazhin sot e prishi plehrat dhe Inceneratorët fantazëm. Imazhi sot u vodh në votime.

Po pse do të më pyesnin prap Ju?

Se u treguat mjeranë pos Fox News. U treguat miopë.

Shkrimi i Neshos shkruhet  e thuhet çdo ditë në Shqipëri, në gojë e publikut, të pensionistëve. Të fshatarëve, i të rinjve që vetëm këtë vit kanë ikur mbi 40 mijë nga Shqipëria, shkruhet në Portale e FB, shkruhet në Raportet e europianëve, shkruhet në median ndërkombëtare, raportohet në forumet e larta të politikës.

Ky imazh nuk u prish në një ditë, nga një shkrim.

Vlerat e shkrimit të Neshos janë se të gjitha këto sot po thuhen në Amerikën politike.

Ky imazh u prish nga një krim.

Ndaj duro Rama, se Fox News është vetëm fillim.