Gazeta RD
Xabi Alonso ka folur në konferencë për shtyp pak orë para sfidës me Juventusin, e vlefshme për të tetën e finales së Botërorit të Klubeve, e cila do të luhet sonte në “Hard Rock Stadium”.
Trajneri i Real Madridit është përballur me plot 22 pyetje, duke i prekur krejt temat e momentit: gjendja fizike e Mbappes, përfshirja e të rinjve, rikthimi i Carvajal e Militao, përdorimi i dronëve në stërvitje, presioni i turneut dhe roli i tij i ri në krye të klubit më të titulluar botëror.
Sa i përket lojës me “Bianconeri”, ai ishte i qartë: “Në këtë pikë të garës fillon ajo thënia: ‘brenda ose jashtë’. Do të luajmë kundër një skuadre të madhe, nevojitet ta përdorim kokën (mendjen), futbollin dhe koncentrimin. Jemi përgatitur mirë dhe jemi gati.”
Prezenca e Mbappes mbetet tema më e diskutueshme: “Ai është më mirë, po flasim me të çdo ditë. Do të vendosim sot, por ka shumë mundësi që do të luajë.”
Nga tabori i lëndimeve arrijnë lajme të mira: “Carvajal e Militao janë ftuar. T’i kesh afër është e rëndësishme, edhe pse kanë nevojë për kohë për ta rigjetur ritmin.”
Sa u përket të rinjve: “Prioritet është të fitojmë, por natyrisht me ndihmën e akademisë. Gonzalo Garcia po bën mirë, Castilla ofron gjithmonë alternativa. Të rinjtë meritojnë mundësi.”
Xabi më pas ka folur edhe për përdorimin e dronëve në seanca stërvitore: “I përdornim edhe në Leverkusen. Duhet të studiohen distancat, që ta kesh një perspektivë ndryshe.”
Rreth aventurës së re në Real Madrid: “Jam vetëm në javën e tretë. Është një fillim i ri, ka shumë për t’u ndërtuar. Por, e shoh raportin dhe marrëdhëniet që rriten çdo ditë. Jam i kënaqur.”
Dhe në fund rreth dyshes Vinicius – Mbappé: “Duam ta shprehim një ide kolektive të fortë, por do të jenë talentet e mëdha që do ta bëjnë diferencën. Mbappe e ka tashmë lidershipin, por të gjithë duhet të kontribuojnë.”
