Gazeta RD
Në mes të përplasjes politike mes qeverisë dhe prokurorisë për ndërtimet në Parkun Kombëtar të Thethit, një grua e moshuar del në qendër të vëmendjes si pronare e 10 kapanoneve që kryeministri Edi Rama i ka shpallur si “krim mbi natyrën”.
Sipas dosjes së siguruar nga gazetarja Anila Hoxha per Top Channel, Prokuroria e Shkodrës ka vendosur të mos nisë hetim penal, pasi kapanonet janë vendosur në pronën e shtetases Lene Prroni një tokë e trashëguar brez pas brezi, pa dokumente pronësie të regjistruara.
Prroni ka deklaruar se kishte kërkuar leje ndërtimi nga Bashkia Shkodër, por iu komunikua se kjo nuk ishte e mundur pa dokumentacion pronësie. Ajo ka sqaruar se objektet janë pa themele, pa beton, dhe sipas njohurive të saj, për struktura të tilla nuk nevojitet leje ndërtimi.
Në dëshminë e saj, e moshuara thotë se paratë për vendosjen e kapanoneve i ka marrë borxh nga të afërmit. Dikur, kishte 300 krerë bagëti në Dukagjin, por u detyrua t’i shesë të gjitha, pasi nuk kishte çoban për t’u kujdesur për to.
Megjithatë, ndërtimet janë kthyer në një kauzë politike. Kryeministri Edi Rama i ka cilësuar kapanonet si ndërtim të paligjshëm që dëmton një zonë të mbrojtur dhe ka akuzuar prokuroren e çështjes, Elsa Gjeli, për mosveprim. Ai njoftoi se Ministria e Drejtësisë do të bëjë një kallëzim ndaj saj pranë KLP-së, duke e quajtur vendimin e prokurorisë “të dëmshëm për interesin publik”.
Nga ana tjetër, Prokuroria e Shkodrës mbetet në qëndrimin e saj: ndërtimet janë të përkohshme, pa themele dhe nuk përbëjnë objekt ndërtimi sipas ligjit. Por duket se ligji nuk është më i rëndësishmi në këtë histori, në qendër është vullneti i qeverisë për të treguar forcë mbi një grua që thjesht donte të ruante bagëtinë.
