Gazeta RD
Gjykata e Posaçme ka pushuar çështjen e denoncimit ndaj Sekretarit të Përgjithshëm të Partisë Demokratike, Flamur Noka, që ishe denoncuar para zgjedhjeve të 11 majit.
Polici i burgut, paditës, Gjergji Vishkulli, e akuzonte deputetin e PD-së për shpifje në lidhje me denoncimin që ligjvënësi bëri më 8 maj se një grup policësh të Burgut të Peqinit ishin përfshirë në fushatë elektorale për shtabin e kandidates aktualisht deputete e PS, Sara Mile dhe grupit të Suel Çelës në Elbasan.
Gjykata e gjeti të pavend denoncimin dhe pushoi sot çështjen. Vendimi u mor nga gjyqtarja e GJKKO, Rudina Palloj.
Noka në denoncimin që bëri gjatë zgjedhjeve parlamentare publikoi një listë me mbi 10 persona, efektivë burgjesh, për të cilët tha se ishin në shtabin e deputetes dhe bënin fushatë për të, duke ushtruar presion dhe kërcënime ndaj kolegëve për heqje nga puna nëse nuk votonin Sara Milen.
Ai deklaroi se madje në lokalin e një prej efektivëve ishte mbajtur edhe një takim elektoral për këtë qëllim.
Pas padisë së efektivit Vishkulli, tani GJKKO e ka pushuar çështjen duke mos e gjetur të mbështetur, kurse paditësi ka të drejtë të ankimojë.
Vendimi i GJKKO-së për çështjen:
“I dëmtuari akuzues Gjergji Vishkulli ka paraqitur pranë Gjykatës kërkesën me objekt: “ 1. Deklarimin fajtor të të akuzuarëve Flamur Noka dhe Shoqëria Tregtare “3 DS & AF Entertainment sh.p.k”, të paditur për veprën penale të shpifjes së kryer botërisht;
- Detyrimin e të paditurëve për të dëmshpërblyer paditësin për dëmin jashtëkontraktor të pësuar nga cënimi i nderit dhe i personalitetit si dhe cënimi i imazhit personal, profesional.
- Detyrimin e të paditurëve të akuzuar të përgënjeshtrojnë lajmin e publikuar në portalin e adminsitruar nga ana e tyre me shpenzimet e veta nëpër të gjitha mediat kombëtare duke publikuar vendimin gjyqësor lidhur me objektin e kërkimit dhe arsyetimin e kryer nga gjykata.”.
Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarja Rudina Palloj, me vendimin Nr. 62, datë 03.10.2025 vendosi:
Pushimin e gjykimit të çështjes me nr. Regj.Them. 97 datë regjistrimi 08.05.2025, që i përket palëve: I dëmtuar akuzues: Gjergj Vishkulli, I akuzuar: Flamur Noka dhe Shoqëria Tregtare “3 DS & AF Entertainment sh.p.k.”, me objekt: “-
Deklarimin fajtor të të akuzuarve të paditur për veprën penale të shpifjes së kryer botërisht.
Detyrimin e të paditurve për të dëmshpërblyer paditësin për dëmin jashtëkontraktor të pësuar nga cenimi i nderit dhe i personalitetit si dhe cenimi i imazhit personal, profesional.
-Detyrimin e të paditurve të akuzuar të përgënjeshtrojnë lajmin e publikuar në portalin e administruar nga ana e tyre me shpenzimet e veta nëpër të gjitha mediat kombëtare duke publikuar vendimin gjyqësor lidhur me objektin e kërkimit dhe arsyetimin e kryer nga gjykata”.”, për shkak të mosparaqitjes pa shkaqe të përligjura të palës së dëmtuar akuzuese.
Shpenzimet gjyqësore të kryera deri në këtë moment, i ngarkohen palës së dëmtuar akuzuese.
Kundër këtij vendimi palët kanë të drejtën e ankimit në Gjykatën e Posaçme të Apelit për Korrupsionin dhe Krimin e Organizuar, brenda 15 (pesëmbëdhjetë) ditëve nga e nesërmja e komunikimit të vendimit të arsyetuar.
Tiranë, më datë 03.10.2025″.
