Gazeta RD
Kryetari i Grupit Parlamentar të PD, Gazment Bardhi shkruan se, nën drejtimin e Belinda Ballukut Porti i Durrësit është kthyer në “strehë të sigurt për kartelet shqiptare të drogës”.
Bardhi theksoi se, kjo situatë është bërë me bekimin e kryeministrit Edi Rama, ndërsa paralajmëroi se as Porti i Durrësit nuk mund të jetë streha e Ballukut nga SPAK.
Ai shtoi se aktrimi i ministres sikur asgjë nuk ka ndodhur teksa prezantonte drejtorin e ri dhe lavdet për Edi Ramën nuk do ta shpëtojnë nga akuzat për korrupsion.
Reagimi i Bardhit
Që nën drejtimin e Belinda Ballukut, me bekimin e Edi Ramës, Porti i Durrësit është shndërruar në strehë të sigurtë për kartelet shqiptare të drogës, ky është një fakt i padiskutueshëm. Por, për fatin e keq të Belinda Ballukut, Porti i Durrësit nuk mund të jetë streha e saj nga SPAK-u.
Aktrimi i sotëm sikur asgjë nuk ka ndodhur apo lavdet pa entuziazmin e përhershëm për Edi Ramën nuk do ta shpëtojnë dot nga akuza penale për veprat e saj madhore korruptive.
Edhe pse shumë minore në krahasim me megaaferat e firmosura nga ministrja më e korruptuar në historinë e Shqipërisë, paraqitja të premten e Belinda Ballukut në dyert e SPAK-ut përbën një hap në drejtimin e duhur.
