Rama mban sekret përfituesit/ Ligj për faljen e detyrimeve tatimore dhe doganore klientelës?

Pas marrjes së nismave për faljen e detyrimeve tatimore çdo 5 vjet, është detyrë e qeverisë si propozuese që të analizojë produktivitetin e tyre. A ka sjellë fshirja e borxhit edukim të biznesit, apo ka nxitur sjellje të kundërt duke dhënë mesazhin që dhe nëse nuk paguhet detyrimi pas disa vitesh administrata do e falë (siç dhe po ndodh)?

A duhet të ketë përgjegjës nga administrata tatimore dhe doganore që nuk kanë zbatuar ligjin Procedurave Tatimore për mbledhjen me forcë të detyrimit, duke nisur me bllokimin e llogarisë së biznesit deri te konfiskimi? Në relacion pranohet që nga 202 mijë biznese përfituese nga kjo nisëm, 81 mijë që kanë një borxh me vlerë 400 milion euro janë ende aktivë!

Kuvendi i Shqipërisë po miraton një ligj pa ditur emrat e përfituesve. Në këtë pikë kemi regres dhe me standardet e vetë mazhorancës socialiste, e cila në një nisëm të ngjashme në vitin 2017 i vuri në dispozicion Komisionit të Ekonomisë listën e emrave e kompanive përfituese. Sigurisht që mbi 50% të detyrimeve e zotëronin firmat e mëdha kliente të licencave dhe kontratave publike.

Nuk mund të ketë justifikim për privatësi dhe sekret tregtar në këtë pikë. Subjektet që po përfitojnë nga ligji i faljes apo nisma tjetër për Paqen Fiskale janë përfitues të fondeve publike që do t’i mungojnë buxhetit, e që duhet të shkonin për qytetarët. Çdo standard ligjor demokratik i çdo vendi (përfshi dhe Shqipërinë) detyron institucionet që të publikojnë përfituesit e fondeve publike!

Edhe në ligjin për Paqen Fiskale, deputetët do të duhet të insistojnë që të ketë transparencë dhe një regjistër publik të bizneseve që nënshkruajnë marrëveshjen! Kush garanton se përfituesit nuk janë kompani koncesionare apo firma të dënuara për evazion dhe pastrim parash? Kush garanton që rritjen e të ardhurave të kompanisë ndër vite nuk e bën një zyrtar i lartë, ish-ministër, ish-deputet, ish- prokuror, ish- gjykatës apo rreth familjar i tyre?

Sipas asaj që ligji ka të shkruar, ky diskrecion mbetet në dorën e administratës tatimore si zbatuese e ligjit për Marrëveshjen e Paqes Fiskale, e cila nuk detyrohet të bëjë publik përfituesit dhe do të kontrollojë vetveten!