Të gjithë po thonë: “Po Rama”?

Nga Petrit VASILI

Pyetja, që nuk po ndalet dot as nga Rama – propaganda dhe as nga Rama-analistët, është sot: “Po Rama?”

As përpëlitjet me Gjykatën Kushtetuese për çështjen Balluku nuk po e shmangin dot pyetjen dominuese: “Po Rama?”

Askush nuk po bindet dot se si në këtë batërdi çështjesh korruptive shumë të rënda, që lidhen direkt me njerëzit më të afërt dhe bashkëpunëtorë të Ramës, vetë ai, Rama, as nuk pyetet, as nuk thirret dhe asnjë proces penal nuk hapet ndaj tij.

Të gjithë këta të akuzuar e kanë pasur për detyrë t’i raportojnë Ramës dhe Rama ka pasur detyrë që t’u kërkojë informacion në përmbushje të detyrës së tij si kryeministër.

Në mjaft afera firma e Ramës është aty, edhe më kryesorja bile, e megjithatë Rama as nuk pyetet, as nuk thirret dhe asnjë proces penal nuk hapet ndaj tij.

Çështje të mëdha si afera McGonigal, Becchetti, inceneratorët, Teatri, kontaktet me Sinaloan, echoparku, porti i Durrësit, kufiri detar me Greqinë e plot të tjera janë përgjegjësi e tij direkte, megjithatë Rama as nuk pyetet, as nuk thirret dhe asnjë proces penal nuk hapet ndaj tij.

Ndaj pyetja bëhet edhe më gjëmuese: “Po Rama?”

Të gjithë kanë parë njerëz pa fund që janë thirrur nga SPAK si persona që kanë dijeni për çështje të caktuara dhe është bërë shumë mirë.

Por të gjithë habiten, çuditen dhe çoroditen kur shohin që njeriu me më shumë dijeni si Rama nuk thirret.

Rama, i cili ka ngritur një ushtri me patronazhistë për të ditur edhe hallet personale të njerëzve, sigurisht që di dhe di shumë për aferat korruptive qindra milionë euro të qeverisë, që e drejton, komandon dhe e urdhëron vetëm e vetëm ai.

Ndaj pyetjes, por edhe detyrimit: “Po Rama?”, nuk i shmanget dot askush.

Tahmaqarllëku i Ramës për pushtet pa fund dhe mandate pa mbarim, ka bërë që ai të kuptojë se i ka ardhur fundi, ashtu si shushunjës, e cila pasi pi gjak sa ngopet dhe pikërisht në atë moment kur ajo ndihet e nginjur, në atë çast edhe ngordh.

Pyetjes: “Po Rama?” tani nuk i bishtnohet dot më, se i erdhi dita, se Rama ja shpejtoi ditën vetë, ditën e vet me tahmanet e çmendura të tij.

Ndaj edhe të gjithë po thonë: “Po Rama?”