Denoncohet krimi/ Daniel Shima i marrë peng me urdhër të Ramës nuk dihet nëse është gjallë

Kreu i PD, Sali Berisha, denoncoi pengmarrjen e ish-numrit dy të AKSHI-t, Daniel Shima, duke thënë se fatin e tij askush nuk e di.
Berisha deklaroi se, Shimës i është dorëzuar fleta e shkarkimit nga Lubia Bis sapo doli nga Skapi dhe më pas është marrë peng nga persona me uniformë policie. Ai tha se ngjarjet tregojnë se Danieli mund të ketë qenë i “dekonspiruar” dhe se nuk është parë më që nga ajo ditë.
“A është Gerond Meçe i vetmi person i marrë peng?
Jo, jeni dëshmitarë se tre muaj u mor peng Daniel Shima.
Ajo e kishte marrë shofer Danielin, nga shofer e kishte bërë mbishofer.
Nga mbishofer, e kishte bërë zëvendësdrejtor të AKSHI-t, imagjinoni ju tani.
Zëvendësdrejtori i AKSHI-t, se këtu ka historia nga më të papërshkruara, të të gjitha llojeve.
Zëvendësdrejtori i AKSHI-t, një ditë prej ditësh, thirret nga Lubia bis dhe i dorëzohet fleta e shkarkimit nga detyra, kur ditën që kjo u thirr nga SKAP, kur u pyet 7 apo 8 orë sipas medieve, dhe sa doli, shkoi direkt në zyrë dhe i komunikoi largimin nga detyra.
Nuk u mjaftuan me kaq.
Se pse e tek, natyrisht mendja të shkon përderisa ky akt ndodhi fill sapo doli nga SKAPI, dikush asaj i kishte thënë se spiuni është Danieli.
Se ndryshe nuk ka si kuptohet.
Danieli, pra, duket se ishte dekonspiruar.
Dhe çfarë i ndodh Danielit, jeni të gjithë dëshmitarë
Një ditë, në mes të bulevardit, në mes të Tiranës, persona të veshur policë e rrethojnë dhe Danieli e kupton menjëherë se do ketë fatin e Gerondit.
Dhe në moment i çon partneres, apo nënës se vet, po më rrëmbejnë, po më marrin peng, persona me uniformë policie.
E marrin, e fusin në makinë, e nisën nga Rruga e Elbasanit, tek fakulteti i gjuhë letërsisë, e futën në Qytetin Studenti, u kthyen dhe vazhduan rrugët drejt e në bodrumet e Suel Çelës.
Në bodrumet e Suel Çelës, urdhri ishte ta groposnin, por urdhri ndryshoi sapo u mor vesh se ky ma dorëzuar mesazh se uniforma të policisë po më rrëmbejnë.
Kështu që e shtruan në dru Danielin, ia thyen kockat, dhe e prunë gjysmë të vdekur në ora 4 të mëngjesit në shtëpi.
Nga ajo ditë gjer sot, Danielin nuk e ka takuar më asnjë njeri.
Është i gjallë apo nuk është i gjallë, jeton apo nuk jeton, askush nuk e di.
Jam përpjekur t’i bëj thirrje medieve, t’i bëj thirrje Avokatit të Popullit, t’i bëj thirrje shoqërisë civile që të shkojnë ta takojnë në shtëpi, por thirrjet e mia nuk kanë gjetur asnjë përgjigje nga askush.
Për fatin e Danielit as sot nuk dihet, është i gjallë apo nuk është i gjallë, jeton apo jo.
Një gjë dihet për Danielin, ai u shkarkua nga Lubia bis sapo ajo u kthye nga Skapi në zyrën e saj. Pra, këto zhvillime!”, u shpreh Berisha.