Gazeta RD
Susie Wiles, shefja e stafit të Shtëpisë së Bardhë, do të fillojë trajtim për kancer të gjirit në fazë të hershme, njoftoi Presidenti Donald Trump përmes postimit në Truth Social.
Trump e përshkroi Wiles si “një shefe stafi e jashtëzakonshme, një person të shkëlqyer dhe një nga njerëzit më të fortë”, duke shtuar se ajo do të “marrë menjëherë këtë sfidë” dhe se “prognostiku mjekësor është i shkëlqyer”.
Ai theksoi gjithashtu se Wiles do të vazhdojë të punojë “gati me kohë të plotë në Shtëpinë e Bardhë” gjatë trajtimit dhe e lavdëroi për forcën dhe përkushtimin e saj: “Si një nga këshilltaret e mia më të ngushta dhe më të rëndësishme, Susie është e fortë dhe thellësisht e përkushtuar ndaj shërbimit për popullin amerikan. Ajo së shpejti do të jetë më e mirë se kurrë!”
Susie Wiles, 68 vjeç, është gruaja e parë që shërben si shefe e stafit të Shtëpisë së Bardhë që nga krijimi i këtij posti gjatë administratës së Eisenhowerit. Ajo ka bashkë-menaxhuar fushatën presidenciale të Trumpit për vitin 2024 dhe ka qenë një nga pak këshilltarët që qëndruan pranë tij pas humbjes në zgjedhjet e vitit 2020 dhe trazirave të 6 janarit 2021. Si shefa e pestë e stafit gjatë pesë viteve të presidencës së Trumpit, Wiles konsiderohet më e suksesshmja në ruajtjen e favorizimit të presidentit dhe menaxhimin e operacioneve të Shtëpisë së Bardhë. Me një karrierë të gjatë në politikën republikane që nga vitet 1970, ajo ka shërbyer më parë në administratën e Reaganit dhe ka ndërtuar një karrierë të suksesshme si këshilltare politike dhe lobiste në Florida, ku hyri në orbitën e Trumpit gjatë fushatës së tij presidenciale në 2016. Ajo është gjithashtu vajza e ish-ligjeruesit të NFL dhe prezantuesit televiziv Pat Summerall.
