Të gjithë duan të jenë nga pak Sali Berishë

Greta Beqiri

Ka njerëz që hyjnë në politikë për një mandat, për një post, për një privilegj. Dhe ka njerëz që hyjnë në histori. Sali Berisha është një nga ata njerëz që nuk mbetet vetëm emër në listën e drejtuesve të një vendi, por shndërrohet në simbol force, rezistence dhe epokë.

Prandaj sot, edhe pse shumë përpiqen ta sulmojnë, ta minimizojnë apo ta zëvendësojnë, e vërteta është një: të gjithë duan të jenë nga pak Sali Berishë.

Sepse askush tjetër në politikën shqiptare nuk ka arritur të mbijetojë me të njëjtën fuqi përballë çdo stuhie. Askush tjetër nuk ka pasur aftësinë të rikthehet më i fortë pikërisht në momentet kur kundërshtarët festonin fundin e tij. Ata menduan se do ta rrëzonin me sulme, me propagandë, me izolim, me pushtet, me institucione. Por harrojnë gjithmonë diçka: figurat e zakonshme rrëzohen nga goditjet, ndërsa liderët e vërtetë forcohen prej tyre. Madje edhe ata që e kritikojnë më shumë, shpesh përfundojnë duke folur për të më shumë se për veten. Dhe kjo është ndoshta prova më e madhe e forcës së një figure politike: kur kundërshtarët nuk arrijnë të dalin dot nga hija jote.

Berisha nuk është produkt i marketingut politik. Nuk është një figurë plastike e krijuar nga ekranet apo nga zyrat e propagandës. Ai është politikan instinkti, përballjeje dhe beteje. Një njeri që flet si mendon dhe përballet si pak të tjerë. Dhe kjo është arsyeja pse miliona shqiptarë e kanë parë gjithmonë si liderin që nuk u fsheh kurrë.

Ndërsa kundërshtarët e tij ndryshojnë maska sipas interesit të ditës, Berisha mbetet i njëjtë: i drejtpërdrejtë, luftarak dhe i pakontrollueshëm. Ata kanë pushtetin, administratën, paratë dhe ekranet. Ai ka diçka që nuk blihet dot: besimin dhe energjinë që krijon te njerëzit.

Dhe kjo i tmerron.

I tmerron fakti që një njeri, pas kaq dekadash, vazhdon të dominojë debatin publik. I tmerron fakti që emri i tij prodhon më shumë reagim se gjithë propaganda e tyre së bashku. I tmerron fakti që, edhe kur përpiqen ta sulmojnë, përfundojnë duke e bërë akoma më qendror.

Në të vërtetë, shumë prej atyre që sot flasin kundër tij, në heshtje do të jepnin gjithçka për të pasur forcën e karakterit të Berishës, memorien e tij politike, aftësinë për të ndezur shpresë dhe për të mbajtur gjallë një opozitë edhe në momentet më të vështira.

Sepse Shqipëria ka parë ministra, deputetë, kryetarë partie e figura kalimtare që erdhën dhe u zhdukën bashkë me pushtetin. Por Berisha mbeti. Dhe ky është ndryshimi mes një politikani të zakonshëm dhe një lideri historik.

Në fund, kundërshtarët e tij kanë një problem të madh: ata nuk po luftojnë thjesht një njeri. Po luftojnë një figurë që është bërë pjesë e historisë politike shqiptare.

Dhe historia nuk zhbëhet me propagandë, sepse në thelb, të gjithë duan të jenë nga pak Sali Berishë.