Gazeta RD
Nga Gautier Lecardonnel/ CourrierPicard.fr
Gjykata e Apelit në Amiens ka rrëzuar kërkesën për lirimin e biznesmenit shqiptar Ermal Beqiri, ndaj të cilit Shqipëria ka kërkuar ekstradimin. Ai dyshohet për përfshirje në një rrjet që përfitonte tendera publikë përmes manipulimit të konkurrencës dhe intimidimit.
Biznesmeni shqiptar Ermal Beqiri do të vijojë të qëndrojë në burg në Francë, pasi drejtësia franceze ka refuzuar kërkesën e tij për lirimin nga paraburgimi. Vendimi u mor të premten, më 23 tetor, nga Dhoma e Hetimeve e Gjykatës së Apelit në Amiens, e cila shqyrtoi në themel kërkesën për ekstradimin e tij drejt Shqipërisë.
Beqiri, i cili jeton në një kështjellë në Berneuil-en-Bray, në departamentin Oise të Francës, kundërshton ekstradimin drejt vendit tonë. Prokuroria e Posaçme kundër Korrupsionit në Tiranë dyshon se ai është një prej personave të përfshirë në një rrjet që dyshohet se ka përfituar tendera publikë në sektorin e teknologjisë së informacionit, duke deformuar konkurrencën dhe përdorur intimidimin.
Sipas të dhënave të bëra publike nga mediat franceze, hetimet në Shqipëri përfshijnë 19 procedura prokurimi publik, me një vlerë të përllogaritur prej rreth 59 milionë eurosh.
Shqipëria dërgon dokumente shtesë në Francë
Në gusht, Dhoma e Hetimeve kishte kërkuar informacione shtesë përpara se të shprehej mbi kërkesën për ekstradim. Për shqyrtimin e fundit, autoritetet shqiptare i kanë përcjellë drejtësisë franceze dokumente shtesë, përfshirë një shkresë nga ministri i Drejtësisë, një dokument nga drejtuesi i Prokurorisë së Posaçme lidhur me garancitë juridike, si dhe një dokument nga Drejtoria e Përgjithshme e Burgjeve.
Megjithatë, mbrojtja e biznesmenit ka vënë në pikëpyetje si formën, ashtu edhe përmbajtjen e dokumentacionit të paraqitur nga autoritetet shqiptare.
Avokati i tij, Nicolas Paganelli, i ka cilësuar dokumentet si të paplota dhe joserioze, duke argumentuar se ato nuk ofrojnë garanci të mjaftueshme. Sipas tij, çështja ka edhe sfond politik.
Ermal Beqiri: Është shteti ai që ka korruptuar
Gjatë mbrojtjes së tij, Beqiri ka pretenduar se nëse ka pasur korrupsion, përgjegjësia qëndron te shteti shqiptar.
“Nëse kam korruptuar dikë, është shteti. Por nga kjo anë, askush nuk është në burg. Gjithsesi, këtu ka një problem”, citohet të ketë deklaruar biznesmeni, sipas medias franceze Courrier Picard.
Avokati i përgjithshëm në Amiens ka mbështetur qëndrimin se ekstradimi duhet të realizohet, duke theksuar se vlerësimi i sistemit gjyqësor shqiptar nuk është kompetencë e Dhomës së Hetimeve.
Gjatë shqyrtimit të çështjes, është përmendur edhe pretendimi se në Shqipëri po zhvillohet një “pastrim i madh” i organizuar, një argument i paraqitur në kuadër të debatit mbi ekstradimin.
Për momentin, Ermal Beqiri mbetet në burg në Francë, ndërsa procedura për ekstradimin e tij drejt Shqipërisë vijon. Refuzimi i kërkesës për lirim nuk përbën në vetvete një vendim përfundimtar mbi fajësinë e tij apo mbi përfundimin e procedurës së ekstradimit.
