Kedhi, në Kuvendin e Bashkimit të Forumit Shqiptar në Tuz

Përcollëm përshëndetjet dhe urimet më të përzemërta të zotit Berisha për shqiptarët e Malësisë dhe mbështetjen e plotë për ta.

Ishte emocion i veçantë të ishim mes patriotëve të Malësisë, që na mikpritën vëllazërisht dhe, me bashkimin në një parti të vetme, dhanë një mesazh të fuqishëm që interesi i përbashkët kombëtar qëndron mbi dallimet dhe ambiciet personale.

Siç e thashe dhe në fjalën time, në tokën e Dedë Gjo Lulit, ku më 1911 u ngrit flamuri në Deçiq, ky bashkim merr kuptim të veçantë. Nga Deçiqi te Vlora e Pavarësisë, historia na ka mësuar se kur shqiptarët bëhen bashkë, janë më të fortë për të mbrojtur identitetin, lirinë dhe të ardhmen e tyre.

Forumi Shqiptar shënon një hap të rëndësishëm, historik, për fuqizimin e përfaqësimit politik të shqiptarëve në Mal të Zi dhe mbrojtjen e të drejtave të tyre. Një faktor shqiptar i fortë do të thotë një Mal i Zi më demokratik e më i qëndrueshëm e më pranë BE-së. Shqiptarët kanë qenë e mbeten faktor stabiliteti në Ballkan, të përkushtuar ndaj paqes, bashkëpunimit dhe orientimit euroatlantik.

Mbi ne në tokën amë, bie përgjegjësia historike sot për të shpëtuar vendin e për të rindërtuar një Shqipëri të fortë, demokratike dhe të zhvilluar, që të jetë mbështetje e sigurt për shqiptarët dhe forcimin e faktorit shqiptar në mbarë rajonin.

Kënaqësi e veçantë të bisedonim me z. Gjeloshaj, ministrin Marash Dukaj, nënkryetarin e Kuvendit Nikollë Camaj, kryetarin e Tuzit Lindon Gjelaj, ministra të qeverisë, z. Edon Balidemaj, zv.kryetar i Komunes se Gucise, mikun tim Albert Bikaj, këshilltar i zëvendëskryeministrit e anëtar kryesie i sapozgjedhur, dhe shumë miq të nderuar.

Përgëzime Forumit Shqiptar për këtë bashkim historik! Urime zotit Gjeloshaj per zgjedhjen si kryetar i parë i Forumit! Te Partia Demokratike e Shqipërisë, shqiptarët e Malit të Zi do të gjejnë përherë një derë të hapur dhe një shtëpi të dytë.