Gazeta RD
Protesta e radhës kundër qeverisë ka mbledhur këtë të hënë qytetarë, të rinj dhe studentë para Kryeministrisë në Tiranë, në vijim të tubimeve të zhvilluara gjatë ditëve të fundit.
Ndërsa protestat e mëparshme janë shoqëruar me përplasje mes demonstruesve dhe Policisë së Shtetit, mbrëmjen e sotme në fokus kanë qenë edhe masat administrative ndaj personave të pranishëm në tubim.
Rreth orës 19:45, situata është tensionuar në momentin kur efektivët e policisë kanë nisur të vendosin gjoba për disa qytetarë. Punonjësit e policisë u kanë kërkuar atyre dokumentet e identifikimit për të kryer procedurat administrative, por janë kundërshtuar nga personat e ndaluar.
Një prej qytetarëve i tha Euronews se ishte ndaluar teksa po ecte në trotuar, ndërsa polici i kishte komunikuar se ishte identifikuar përmes fotografive të realizuara gjatë protestës.
“Po kaloja në trotuar dhe një punonjës policie më kërkoi mjetin e identifikimit, duke më thënë se isha fotografuar në tubim. Polici po bënte gjobën, por unë nuk ia firmosa dhe i kërkova arsyen. Më tha se isha fotografuar në tubim. Unë i thashë se kisha qenë duke kaluar në trotuar me shokët. Më ndaloi dhe më tha se isha konstatuar në foto”, rrëfeu ai.
