Gazeta RD
Kompania e mediave sociale zotohet të zbatojë marrëveshjen, duke hapur rrugën për një betejë të ashpër ligjore
Elon Musk ka njoftuar Twitter se ai synon të ndërpresë marrëveshjen e blerjes së grupit të mediave sociale për 44 miliardë dollarë, duke e akuzuar atë për informacion “të rremë dhe mashtrues” në lidhje me numrin e llogarive false dhe spam.
Përpjekja e Musk për t’u tërhequr nga marrëveshja krijon terrenin për një betejë të fortë ligjore mes shefit ekzekutiv miliarder të Tesla dhe platformës së mediave sociale. CEO i Twitter, Bret Taylor, u përgjigj me shpejtësi, duke thënë se bordi ishte “i përkushtuar për të mbyllur transaksionin sipas çmimeve dhe kushteve të dakorduara me zotin Musk” dhe do të ndiqte veprime ligjore për të zbatuar marrëveshjen.
“Ne kemi besim se do të mbizotërojmë në Gjykatën e Delaware,” shtoi Taylor, duke iu referuar vendit të njohur për çështjet gjyqësore të biznesit.
Avokatët e shefit ekzekutiv të Tesla pretenduan se Twitter ishte “në shkelje materiale të dispozitave të shumta” të marrëveshjes së shitjes dhe “duket se kishte bërë përfaqësime të rreme dhe mashtruese”. Sipas analizës paraprake nga këshilltarët e Musk, numri i llogarive të padëshiruara dhe të rreme në platformë ishte “jashtëzakonisht më i lartë” se 5 për qind e vlerësuar nga Twitter.
Aksionet e Twitter ranë gati 5 për qind në bursa.
Kjo lëvizje është kthesa e fundit në një sagë dramatike që filloi kur Musk njoftoi për herë të parë se kishte marrë aksione në Twitter në fillim të prillit, me synimin për të rivendosur një etikë të “fjalës së lirë” në platformë.
Javë më vonë Musk shkaktoi tronditje në Wall Street kur njoftoi ofertën e tij për të marrë përsipër Twitter me një çmim prej 54.20 dollarë për aksion, të cilin kompania përfundimisht e pranoi. Ai më pas tha se marrëveshja ishte “përkohësisht pezull ” për shkak të dyshimeve nëse Twitter kishte deklaruar me saktësi numrin e llogarive false dhe të padëshiruara. Disa analistë dhe punonjës të brendshëm në Twitter e interpretuan këtë si një shprehje të pendimit të blerësit dhe spekuluan se Musk po përpiqej të arrinte një marrëveshje më të lirë.
Musk tha se dështimi i Twitter për të ofruar informacione rreth llogarive të rreme do ta bënte problematike sigurimin e financimit nga bankat, që ranë dakord t’i jepnin atij paratë hua për të përfunduar transaksionin.
Marrëveshja përfshin një “tarifë në rast rezultati të kundërt” prej 1 miliard dollarësh që Musk do t’i detyrohej nëse tërhiqej nga marrëveshja. Megjithatë, nëse plotësohen të gjitha kushtet e tjera të mbylljes, përfshirë financimin, Twitter mund të kërkojë ta detyrojë Musk të mbyllë marrëveshjen. Gjykatat e SHBA historikisht kanë mbajtur anën e shitësve në betejat ligjore kur blerësit përpiqen të mbyllin marrëveshjet për të dekurajuar blerësit që të largohen për arsye të rreme.
