Gazeta RD
Gjykata e Posaçme dhe SPAK vazhdojnë të shkelin Kushtetutën. Me një njoftim për mediat, GJKKO njofton se ka vendosur vazhdimin e masës së sigurimit të kryetarit të Partisë Demokratike, Sali Berisha, pa kërkuar leje në Kuvendin e Shqipërisë.
Gjyqtarja Irena Gjoka shprehet se, ka vendosur vazhdimin e masës së sigurisë ‘detyrim paraqitej’ për kryedemokratin, Sali Berisha.
Sipas njoftimit të Gjykatës, dhe vendimit antikushtetues, kryetari i PD-së, Sali Berisha duhet të paraqitet të hënën e parë dhe të tretë të muajit në orën 10:00 para oficeri të policisë gjyqësore, Adelajda Metaj.
Njoftimi i GJKKO
– Në datën 26.10.2023, ora 15.00, në Gjykatën e Posaçme të Shkallës së Parë për Korrupsionin dhe Krimin e Organizuar, u riçel seanca gjyqësore për vijimin e shqyrtimit të kërkesës së paraqitur nga Prokuroria e Posaçme, me objekt ‘Marrjen në pyetje të shtetasit nën hetim Sali Berisha’.
– Të pranishëm në sallën e gjykimit ishin prokurorët Arben Kraja dhe Enkeleda Millona, ndërsa i hetuari Sali Berisha u përfaqësua nga mbrojtësit e caktuar kryesisht nga gjykata, av.Rabije Cenalia dhe av.Jalldiz Kastrati.
– Gjykata bëri me dije se pranë kryesekretarisë së kësaj gjykate, ditën e sotme, datë 26.10.2023, ora 09.45, është depozituar një kërkesë nga shtetasi Sali Berisha, me objekt përjashtimin e gjyqtares nga gjykimi i kësaj çështje. Mbi këtë kërkesë, me vendimin nr.430 Akti, datë 26.10.2023 të GJKKO është vendosur mospranimi i kërkesës së kërkuesit Sali Berisha, me objekt përjashtimin e gjyqtares Irena Gjoka, si të pabazuar në prova dhe në ligj.
– Mbrojtësit e caktuar kryesisht nuk morën përsipër realizimin e mbrojtjes dhe në këto kushte, referuar listës së avokatëve kryesisht, gjykata caktoi si avokate kryesisht av. Valentina Todoresku, të cilës i la kohën e nevojshme për tu njohur me aktet e kërkesës me objekt marrjen në pyetje të shtetasit nën hetim Sali Berisha.
