Gazeta RD
Nënkryetari i PD, Agron Gjekmarkaj, në ditën e dytë të takimit të 18-të të Stabilizim-Asocimit Shqipëri-BE, ka ngritur para eurodeputetëve shqetësimin e kapjes së drejtësisë.
Gjekmarkaj e ka konsideruar kreun e Partisë Demokratike, Sali Berisha si një të arrestuar politik, teksa sipas tij, është e pakonceptueshme në vendet europiane, që i gjithë lidershipi i opozitës të arrestohet dhe burgoset 6 muaj para zgjedhjeve.
Më tej, ai përmendi edhe faktin se janë dëbuar me 60 ditë nga Kuvendi, një akt që nuk ndodh askund në Euopë, teksa kërkoi zhbërjen e rregullores të miratuar vetëm me votat e mazhorancës.
Deputeti demokrat ka patur një kundërpërgjigje dhe ndaj dy eurodeputetëve italianë, pjesë të delegacionit, të cilët akuzuan opozitën se po bën politik me integrimin. Gjekmarkaj tha se nuk mund të kërkohet nga italianët që deputetët e opozitës të jenë të heshtur dhe garniturë, pasi sipas tij, edhe në Itali, nuk është se ka një situatë të tillë, madje shpesh herë ka debate të ndezura.
Gjithashtu, ai deklaroi se Shqipëria ka bërë hapa përpara me punën e shqiptarëve në 30 vjet dhe se këtë gjë nuk mund ta përvetësojë një politikan i vetëm.
“Ne si deputet të opozitës jemi këtu në shenjë respekti dhe mirënjohjeje për ju! E çmojmë shumë komunikimin dhe ndihmën tuaj! Kolegët tanë janë në protestë për çështje madhore të demokracisë në Shqipëri! Ne jemi këtu sepse integrimin e kemi nisur në si PD në vitin 1990 dhe e konsiderojmë jetik për vendin tonë! Ne nuk provokuam askënd në këtë sallë! Nuk fyem dhe nuk bëmë teatër ! Ngritëm shqetësime që i konsiderojmë tepër të rëndësishme! Ne jemi të përjashtuar nga 40-60 ditë, më saktë jemi të dëbuar nga Parlamenti! Duhet të mirëkuptoni realitetin! Një rregullore e dhunshme e miratuar së fundmi dhunshëm me kartonat e mazhorancës për të ndëshkuar opozitën! Një e tillë nuk ekziston askund në Europë në vendet tuaja! Ndoshta akti i parë i ndihmës mund të jetë thirrja që kjo rregullore të hiqet!
Zonja e Zotërinj! Ne jemi europianë, kemi qenë gjithmonë! Askush nuk e di më mirë se ne çfarë do të thotë të luftosh 6 shekuj për kontinentin tonë! E kemi patur, e kemi humbur, e kemi rigjetur dhe përpiqemi që në vendin tonë të kemi ato standarte! Jemi europianë si ju, por kemi patur fat më të keq! Në 34 vite Shqipëria ka ndryshuar falë lirisë dhe punës së shqiptarëve e këtu nuk mund ta përvetesojë dikush politikisht kohën tonë.
Miqve italianë dua t’u them se e njoh mirë politikën e vendit fqinj, kam studiuar e jetuar me vite atje. Dialektika dhe debati as atje nuk është i rrafshët, madje shpesh i ndezuar e nuk mund të na kërkohet ne të jemi të heshtur e garniturë! Asnjëri prej jush sa do ta keni te lartë respektin për drejtësine e pavarur se të tille e duam dhe ne , nuk e koncepton që 6 muaj para zgjedhjeve krejt lidershipi i partive opozitare të ishte i arrestuar apo burgosur! Në Shqipëri lideri i opozitës është një i arrestuar politik! Mendoni një çast t’i keni në burg zonjën Shlein kryetaren e Opozitës në Itali, Renzin, Calenden e të tjerë që nuk më vinë emrat dhe sa do ishit të ftohtë në gjykim? Si shoqëria do ta perceptonte! A do i shpëtonit ju përcaktimit që po ndërhyhet në fushatën elektorale dhe në rezultatin e zgjedhjeve? Ndaj kërkoj mirëkuptimin tuaj për problemet që opozita ngriti”, tha Gjekmarkaj.
Më tej, Gjekmarkaj e konsideroi edhe burgosjen e ish-deputetit Ervin Salianji, si politike, pasi ai nuk ka qenë kurrë në pushtet.
“Mburrja e Kryeministrit për veprimet ligjore kundër gazetarëve për akuza shpifjeje, si në rastin e deputetit Salianji, nxjerr në pah një prirje shqetësuese drejt masave ndëshkuese ndaj medias. Ervin Salianji nënkryetar i grupit të PD person që nuk ka patur kurrë pushtet, që nuk ka ushtruar kurrë asnjë formë korrupsioni, që ka bërë shërbime publike, gjithashtu prej dy muajsh është në burgum politik duke e rendur ndërgjegjen e institucioneve dhe shoqërisë sonë”-u shpreh Gjekmarkaj në tryezën e përbashkët me eurodeputetët.
