Gazeta RD
Deputetja e Partisë Demokratike, Lindita Metaliaj, së bashku me disa deputetë të tjerë të kësaj partie, kanë shkuar në Komisariatin Nr. 6 në Tiranë për të mbështetur 15 protestuesit e shoqëruar gjatë dhe pas protestës së opozitës.
Deputetët e PD e cilësuan shoqërimin e protestuesve si një akt intimidues ndaj të drejtës kushtetuese për protestë dhe një tjetër shenjë të autoritarizmit të qeverisë.
Ata kërkuan lirimin e menjëhershëm të qytetarëve të shoqëruar, duke theksuar se veprime të tilla nuk do të ndalin zërin e opozitës dhe të qytetarëve.
“Është e papranueshme dhe e patolerueshme kjo që po ndodh, sepse protestuesit janë në të drejtën e tyre legjitime për të protestuar. Është një e drejtë që garantohet me Kushtetutë dhe me ligj”, deklaroi Metaliaj.
Deputetët e pranishëm shprehën solidaritetin e tyre me protestuesit dhe vendosmërinë për të vazhduar betejën për liri dhe demokraci.
