Gazeta RD
Deputeti i PD, Tritan Shehu ka reaguar për platformën e kreut të grupit parlamentar Enkelejd Alibeaj për rikthimin e të përjashtuarve në grup. Me ironi, Shehu shpërthen në gëzim, teksa e cilëson hare në prag festash. Sipas tij, sot deklarohet me solemnitet se mjaftnoka vullneti i tyre madhor që të zhbëjë një vendim, që e paska “marrë Këshilli Kombëtar” më datë 12 Janar 2022!
Postimi i plotë i Tritan Shehut
O, çfarë “hareje”! “Vullneti suprem” në prag festash, na fal “jetën”! Më shumë «mirënjohje» lexoj se Alibeaj-Gazi më paskan falur! Sot deklarohet me solemnitet se mjaftonka vullneti i tyre madhor që të çbëjë një vendim, që e paska “marrë Këshilli Kombëtar” me datë 12 Janar 2022!
Dhe ne si “shpirtëra” të përulur duhet ta pranojmë me adhurim këtë shpirt gjerësi! Akoma më qesharake…kjo deklaratë bëhet në emër të «grupit parlamentar», nga vetë ata që janë dhe firmëtarët e atyre paçavureve të 12 Janarit!!
Ndërsa për “vendimin” e datës 9 Shtator nuk ka as edhe një copë letre, por vetëm një “vullnet”, me autor tashmë të “rrëzuar”… …ndoshta prandaj nuk e kanë përmendur, se e konsiderojnë nul!
Sidoqoftë mund ta deklaronin, që kështu “gëzimi” i faljeve të rritej dhe mirënjohja ndaj tyre të zgjerohej! Në fakt e gjithë kjo më kujton disa drama, që shkrimtari i vendos midis tragjikes e komikes njerëzore!
Vështirë ta përcaktosh qartë këtu: Kemi të bëjmë me një tragjedi apo komedi, a është për të qeshur apo për të qarë e gjithë kjo?
Sidoqoftë tashmë pak rëndësi ka. Rëndësi ka psh, që të dielën të 5 degët e Qarkut të Gjirokastrës, me votën e lirë të anëtarëve të PD do të zgjedhin drejtuesit e ardhshëm të tyre, midis kandidaturave dinjtoze.
Le të fokusohemi në këtë proces real e gjithë përfshirës, ringritje e bashkimi të PD, për të arritur në nivelet e fitoreve të domosdoshme mbi këtë rregjim!
