Gazeta RD
Të krijohet Liga e Epirit. Idenë e pazakontë e hedh një nga njerëzit më kontroversë të sportit shqiptar, presidenti i Flamurtarit, miku i Ramës, Sinan Idrizi.
Biznesmeni njihet si miku i Edi Ramës dhe ka qenë aksioneri kryesor në Air Albania.
Numri 1 i klubit kuqezi thekson se, ekipet, kryesisht të jugut, duhet të krijojnë një ligë të përbashkët me ekipet greke. Sipas tij, kjo ligë sjell më shumë të ardhura dhe përfitime për çdo ekip, jep motivim dhe bën që stadiumet të jenë plot e klubet të mos falimentojnë dhe të shkojnë drejt shkrirjes.
Idrizi argumenton se më afër shkon për të luajtur në Janinë sesa me Kukësin, kështu që kjo ligë është zgjidhja më e mirë.
Një ide që sigurisht bie ndesh me projektet e FSHF por ndoshta të pjesës më të madhe të ambjentit sportive në vend që prej vitesh ka ëndërruar krijimin e një lige të përbashkët me Kosovën, edhe kjo një ide që është braktisur disa herë.
“Ne duhet të krijojmë alternativa. Alternativa jonë është krijimi i Ligës së Epirit. Është një ligë e afërt gjeografikisht me veriun e Greqisë, larg nocioneve nacionaliste dhe terminologjisë populiste. Nuk ka asgjë të keqe që të luajmë me fqinjët tanë. E kam thënë që është më e lehtë të shkosh të luash në Janinë se sa në Kukës apo me Veleçikun. Kemi disa ekipe që mund të jenë të interesuara. Në Vlorë kemi tre ekipe, por kemi edhe Sarandën, Gjirokastrën, Delvinën dhe disa skuadra të tjera. Afërsia është reale, pse mos ta kthejmë këtë në një avantazh për ekonominë. Nëse themi që Vlora luan me Janinën apo Igumenicën, të jeni të sigurt që stadiumi do të jetë plot sepse fqinjët janë njësoj të gjithë. Ne nuk duhet ta bëjmë këtë gjë ilegale por ky projekt duhet të fillojë. Futbolli në Shqipëri duhet të decentralizohet. Kjo ligë është një ide rajonale dhe në të ardhmen mund të bashkohen edhe Kosova apo Maqedonia e Veriut nëse do të dëshirojnë”, shprehet ai për Ora News.
