Gazeta RD
Enton DOÇI (Lyon)
Kryeministri sllovak ka lëshuar një paralajmërim të mprehtë për të ardhmen e vendit të tij nëse Rusia e mund Ukrainën gjatë një paneli në Forumin Ekonomik Botëror në Davos, të mërkurën.
“Nëse Ukraina bie, Sllovakia është e radhës”, u tha kryeministri Eduard Heger liderëve të tjerë të BE-së. “Ata (Ukraina) duhet të fitojnë”, tha ai.
Heger vazhdoi të kritikonte anëtarët e Bashkimit Europian se u mbështeten shumë në energjinë ruse. Ai u bëri thirrje udhëheqësve që të “ndalojnë kompromentimin” e parimeve të tyre kur kanë të bëjnë me Rusinë.
“Ne në thelb i këmbyem vlerat tona me gaz dhe naftë të lirë për një kohë të gjatë. Kompromisi me Putinin shkaktoi një luftë në Ukrainë. Një luftë agresive, njerëzit po vdesin”.
Ukrainasit “po derdhin gjakun e tyre për vlerat tona, kështu që ne nuk duhet ta bëjmë”, tha Heger.
Ndërkohë, Presidenti i Ukrainës Zelenskyy ka thënë se Rusia po përdor gjithçka që ka në dispozicion, ndërsa përpiqet të pushtojë katër qytete në rajonin lindor të Donbasit dhe të bllokojë trupat ukrainase. Ai us hpreh se situata në Donbas tani ishte “shumë e vështirë”.
“Praktikisht fuqia e plotë e ushtrisë ruse, çfarëdo që i ka mbetur, po hidhet në ofensivë atje. Liman, Popasna, Severodonetsk, Slaviansk – pushtuesit duan të shkatërrojnë gjithçka atje”, u shpreh presidenti.
Ky i fundit tha se ushtria e tij po rezistonte, por “do të duhet kohë dhe shumë më tepër përpjekje nga njerëzit tanë për të kapërcyer avantazhin e tyre në sasinë e pajisjeve dhe armëve”.
Ai kërkoi gjithashtu armë të tjera, si raketahedhës dhe tanke, që të dërgohen nga Perëndimi. Rusia po përpiqet të marrë kontrollin e plotë të dy provincave të Donbasit, Donetsk dhe Luhansk, dhe të bllokojë forcat ukrainase në një xhep në frontin kryesor lindor.
Ata pushtuan tre qytete në Donetsk të martën, sipas guvernatorit rajonal Pavlo Kyrylenko. Ushtria e Ukrainës tha se kishte zmbrapsur nëntë sulme ruse në Donbas, por se të paktën 14 civilë ishin vrarë.
