Fjalimi i presidentit ukrainas Volodymyr Zelensky në Kongresin Amerikan të mërkurën mbrëma është cilësuar si një fjalim historik dhe shumë i suksesshëm. Shumë media ndërkombëtare e kanë krahusuar me Winston Churchill gjatë Luftës së Dytë Botërore.
Mediat ndërkombëtare, brenda dhe jashtë SHBA-së, e cilësuan fjalimin e presidentit ukrainas pasionant dhe bindës. Vizita e tij ishte saktësisht 81 vite që nga vizita e winston Churchill në Uashington në vitin 1941, muaji kur Shtetet e Bashkuara hynë zyrtarisht në luftë.
Mediat i bënë jehonë mënyrës se si Zelensky zgjodhi t’u drejtohej deputetëve, duke mos kërkuar apo lutur për ndihmë, por duke shpjeguar rëndësinë e mbështetjes së vazhdueshme të SHBA-së dhe Perëndimit në përgjithësi për popullin e tij në mes të pushtimit rus, duke thënë se Ukraina është duke luftuar jo vetëm për veten, por edhe për Europën dhe mbarë botën, raporton abcnews.al.
Deklarata e tij se ndihma për Ukrainën nuk është bamirësi, por investim u brohorit nga të pranishmit. Duke vepruar kështu, sipas vëzhguesve politikë ndërkombëtarë, ai ka arritur atë që përgjithësisht dukej e pamundur, por që arriti të bashkojë ligjvënësit amerikanë, edhe nëse republikanët ende kanë dyshime rreth paketës së ndihmës për Kievin.
Sipas France 24, Zelensky ndoqi hapat e Churchill, siç ka bërë gjatë muajve të kaluar, ndërsa ofensiva ruse në vendin e tij vazhdon. Sidomos deklarata e tij, se Ukraina nuk do të dorëzohet kurrë, duke përsëritur shprehjen nga një fjalim legjendar i kryeministrit britanik gjatë Luftës së Dytë Botërore, i emocionoi të gjithë.
Paralelizimi me Churchill u përshëndet edhe nga Kryetarja e Dhomës së Përfaqësuesve në largim, Nancy Pelosi, pasi babai i saj ishte i pranishëm si deputet gjatë fjalimit historik të kryeministrit britanik në Kongres më 26 dhjetor 1941.
Por gjëja më e rëndësishme është se Zelensky arriti të tregojë rëndësinë e paketës amerikane të ndihmës për Ukrainën.
The Guardian shkruajti se “për një ish-aktor dhe humorist, ishte performanca e jetës së tij”, ndërsa u prit me brohoritje dhe duartrokitje nga deputetët amerikanë, disa prej të cilëve mbanin flamuj ukrainas dhe simbole të tjera.
Por CNN theksoi rëndësinë e zgjedhjes së Zelensky për t’iu drejtuar ligjvënësve dhe senatorëve amerikanë në gjuhën e tyre, pa një përkthyes, gjë që “e përcolli mesazhin më afër zemrave të tyre dhe zemrave të popullit amerikan”, sipas rrjetit amerikan.
Politico vuri në dukje fjalimet e rralla të liderëve të huaj në legjislaturën më të fuqishme në botë, duke vënë në dukje se vetëm Winston Churchill dhe Benjamin Netanyahu i janë drejtuar Kongresit më shumë se Zelensky, raporton abcnews.al.
Kujtojmë se këtë vit në Kongres ka folur personalisht edhe kryeministri grek, Kyriakos Mitsotakis. Në dekadën 2012-2021, vetëm nëntë liderë të huaj iu drejtuan një sesioni të përbashkët të Dhomës së Përfaqësuesve dhe Senatit të SHBA-së.
Ai gjithashtu vuri në dukje se Kongresi e kishte lejuar Zelensky-n të thyente protokollin që kërkonte që liderët të veshnin një kostum, me presidentin ukrainas duke iu drejtuar ligjvënësve dhe senatorëve të veshur me uniformë ushtarake.