Gazeta RD
Një debat ka shpërthyer në Komisionin për Çështjen Ligjore të Kuvendit ndërmjet deputetëve të PD-së dhe kryetares socialiste të komisionit, Klotilda Bushka, e cila kërkon ta zhvillojë mbledhjen të mbyllur, pa praninë e gazetarëve, lidhur me kërkesën e deputetëve të PS për përjashtimin 10 ditë nga Kuvendi, të tetë kolegëve të PD-së.
Në mbledhje janë gjashtë nga deputetët e përjashtuar të PD-së, që do ta kundërshtojnë në komision, përjashtimin e tyre nga seanca e parlamentit, por ata insistojnë që media ta ndjekë live mbledhjen, për hir të transparences, të mësohet e vërteta për ç’ka ndodhi senacën e kaluar në parlament, gjatë përplasjes me kryetaren Lindita Nikolla për mocionin me debat ndaj Kryeministrit për çështjen McGonigal.
Kryetari i Grupit të PD, Luçiano Boçi, tha: “Ju lutem zbatoni rregulloren dhe për rastin e pranisë së mediave, Nuk mund ta trajtoni parlamentin si pronë. Jemi në shkelje të dy neneve të rregullore. Nëse flitet për etikë, etika në radhë të parë është zbatimi i ligjeve të shkruara. E dini shumë mirë frikën tuaj për të folur për skandalin e Ramës dhe mundoheni të shuani zërat e opozitës. Mënyrat e sjelljes tuaj është që të na mbyllni gojën ne. Edhe kaq gjëra të vogla që ne i konsiderojmë pjesë të luftës politike. Ne do themi këto që do përcaktojmë. Kryetarja e Kuvendit i ka shkelur ligjin me të dyja këmbët. Kërkesa jonë ka qenë e qartë. Kemi qëndruar në foltore me të drejtën tonë për të kërkuar fjalën. Nuk na pengon njeri. E njeh rregullorja. Unë mund ta marr fjalën sa herë dua. Personi që duhet të vinte për shkelje etike këtu duhet të ishte Kryetarja e parlamentit.”
Deputetja Albana Vokshi ka ngritur zërin me forcë duke i bërë thirrje Bushkës të lejojë praninë e medias: “Nuk e bën dot të mbyllur mbledhjen, nuk jemi në diktaturë. Ka procedurë.”
Deputetët po e transmetojnë vetë live, këtë debat, duke e xhiruar me celular dhe transmetuar në Facebook.
