Gazeta RD
Mes kaosit në Kuvend, janë votuar pro të gjitha projekligjet e parashikuara për diskutim në seancë plenare, mes të cilëve edhe ai për bastet sportive me 72 vota pro.
Në nisje të seancës, deputetët e opozitës kanë bllokuar foltoren dhe me pankarta në duar, u kanë fryrë bilbilave teksa kryeparlamentarja Nikolla ka lexuar rendin e ditës.
Në këtë mënyrë, seanca nuk ka vijuar në mënyrë normale dhe votimi për projekligjet e parashikuara ka kaluar me procedurë të përshpejtuar. Seanca e sotme ka zgjatur vetëm 18 minuta mes kaosit dhe tensionit të shkaktuar nga deputetët e opozitës.
Gjithashtu në seancës ishte parashikuar që të mbahej një interpelancë me kryeministrin Rama për çështjen “Ahmetaj”, e kërkuar nga disa deputetë të opozitës.
Në nisje të seancës, Nikolla ka njoftuar se për shkak të angazhimeve zyrtare të kryeministrit Rama në Bruksel, ky i fundit ia ka deleguar interpelancën ministres Spiropali, gjë që është kundërshtuar nga deputetët.
