DEKLARATA E ZËDHËNËSES PËR ANTIKORRUPSION NË PD, GENTA VANGJELI:
Në emër të parimeve të së Drejtës Publike për Informim, Partia Demokratike ndan shqetësimin mbi rastet e censurës të realizuar me të dhëna të Thesarit Publik të Shtetit.
![](https://pdsh.al/wp-content/uploads/2024/06/1-1024x511.jpg)
Prej datës 19 Prill 2024 deri në datën 9 Maj 2024 në faqen zyrtare ku publikohen të dhënat elektronike mbi pagesat e kryera nga Thesari i Shtetit nuk u publikua asnjë faturë.
Ndodh shpesh që edhe pse kalojnë ditë të tëra pa publikime edhe kur publikohen fatura të caktuara janë të paaksesueshme siç është fatura datë 15 Maj 2024.
![](https://pdsh.al/wp-content/uploads/2024/06/2-1024x502.jpg)
Qytetarët shqiptarë kanë të drejtë të informohen si shpenzohen paratë e tyre, ku shkojnë ato, a përdoren për interesa publik apo interesa politik, partiakë apo personalë.
Po kështu çdo qytetar i Republikës së Shqipërisë ka të drejtë të informohet se cilët janë klientët (furnitorët të cilët nuk shfaqen gjithnjë me emër por vetëm me emrin e bankës ku kanë llogaritë e tyre) e institucioneve shtetërore e publike që përfitojnë nga paratë e taksapaguesve.
Gjithashtu në kuadër të angazhimeve në partneritetin për Qeverisje të Hapura dhe Transparente OGP, shteti ynë është angazhuar për të publikuar çdo ditë Listën e Pagesave Ditore të Thesarit dërguar për ekzekutim në Bankën e Shqipërisë. Kjo listë veç datës, shumës dhe autoritetit urdhërues përmban edhe identitetin e përfituesit, aktin ligjor ku bazohet transaksioni dhe përshkrime të tjera.
Heqja e këtyre të dhënave me dashje apo mospublikimi i tyre në vijimësi, dëshmon një rast shpërdorimi detyre apo në rastin më negativ një fenomen që dëshmon se, për këtë periudhë qeverisëse shtetarët përkatës kanë vështirësi të përballen me publikun.