U shoqërua në polici, Balliu: S’kemi bërë ndonjë krim, protestat nuk do të ndalen!

Shefi i Organizimit në PD, Klevis Balliu ishte mes 10 protestuesve të shoqëruar ditën e sotme nga Policia e Tiranës pas tensioneve të krijuara para Kuvendit.

Pas dhënies së deklaratës në ambientet e policisë sot, Balliu është shprehur për mediat se protestuesit e shoqëruar nuk kanë bërë ndonjë krim dhe do të paraqiten sa herë të thirren për këtë arsye.

Ai shtoi se nëse policia nuk i gjen protestuesit, ata do të jenë te bashkia ose te Parlamenti pasi protestat sipas tij nuk do të ndalen.

“Erdhëm, paraqitemi me kënaqësi se nuk kemi bërë ndonjë krim. Më bën përshtypje sa shpejt dalin informacionet për të kapur protestuesit, Po të dilnin për Fushë Krujën, Elbasanin s’do kishim këtë situatë të agravuar krimnale. Sikur të vepronin aq shpejt me Veliajn, Olsi Ramën, Edi Ramën, Xhaçkën, etj, të cilët janë përgjegjës për vjedhjet makabre që u bëhen qytetarëve dhe për shkak të të cilave jemi popull9i me taksat më të larta, rrogat më të ulëta dhe pensionet më qesharake.

Kam një thirrje për policinë, sa herë të doni këtu do vijmë, po nuk na gjetët, do na gjeni te bashkia ose parlamenti se protestat nuk i ndalim. Garantoj çdo efektiv se aty nuk mblidhen kriminelë, por të rinj e të reja. Kriminelët fatkeqësisht janë brenda sallave dhe jo jashtë sallave”, u shpreh Balliu.