Gazeta RD
Kroacia dhe Shqipëria u ndanë në barazim 2-2 në ndeshjen e dytë të grupit B në Euro2024, një rezultat që nuk favorizon asnjë nga kombëtaret, që kanë mbledhur secila nga 1 pikë pas dy ndeshjesh të luajtura.
Kroatët arritën të përmbysin disavantazhin e një goli brenda 3 minutash kur realizuan dy gola të shpejtë në minutat 74 dhe 77 të ndeshjes, por gjithçka iu përmbys në minutën e 94 kur Gjasula realizoi golin e barazimit.
Ndoshta askush nga kroatët nuk e priste që do të dilnin vetëm me 1 pikë nga përballja me Shqipërinë, aq më tepër kur ndeshja po shkonte drejt përfundimit.
Dhe nga kroatët ai që e ka përjetuar ndoshta më keq këtë rezultat ishte Luka Modriç. Pas fishkëllimës së fundit 38-vjeçari u ul në fushë, duke mbështetur duart mbi gjunjë dhe ishte pothuajse i përhumbur në mendimet e tij.
Në këtë moment kapitenit kroat i është afruar Kristjan Asllani, i cili ka kërkuar ndërrimin e fanellës.
Por ndoshta nuk ka zgjedhur momentin më të mirë për këtë. Modriç ishte ende duke përtypur humbjen e dy pikëve në limite dhe i dha sinjalin Asllanit se do të ndërronte fanellat në dhomën e zhveshjes.
Shqiptari nuk e fajësoi për këtë, por i zgjati dorën Modriçit dhe e ndihmoi të ngrihej në këmbë.
