Skandali/ Policia thërret dhe u kontrollon telefonat 5 ish-punonjësve të RTSH: I prishët imazhin Pezës!

Policia e Shtetit ka thirrur dhe u ka kontrolluar telefonat 5 ish-punonjësve të Radio Televizionit Shqiptar të shkarkuar nga Alfred Peza pas një padie nga ky i fundit, ku pretendon se i kanë prishur imazhin.

Lajmi bëhet me dije nga Asosacioni i Gazetarëve të Shqipërisë, e cila ngre alarmin mbi këtë akt të Policisë së Shtetit. Sipas AGSH-së, pyetja e punonjësve dhe kontrolli i aparateve celularë është një akt i rëndë që synon frikësimin, intimidimin dhe heshtjen e tyre nën sfondin kur këta të fundit, kanë folur hapur për shkarkimet masive dhe të padrejta të Alfred Pezës.

AGSH i kërkon Policisë së Shtetit që të ndërpresë këtë praktikë abuzive dhe të sqarojë menjëherë rrethant e ngjarjes, ndërsa Alfred Pezës i kërkon që të tërhiqetnga këto praktika që synojnë frikësimin e ish-punonjësve të shkarkuar.

Duket se kontrollimi dhe sekuestrimi i celularëve të gazetarëve është bërë rrugë tashmë nga forcat e zbatimit të ligjit, pas aktit të SPAK ndaj gazetarit Elton Qyno, të cilin e mbajti për disa orë nën presion, duke i kontrolluar më pas zyrën dhe banesën dhe i sekuestruan sendet personale.

Reagimi i AGSH

Asociacioni i Gazetarëve të Shqipërisë është tepër i alarmuar për veprimet e Drejtorit të Përgjithshëm të Radio Televizionit Shqiptar Alfred Peza dhe Policisë së Shtetit, në raport me të paktën 5 ish-punonjës të RTSH-së.

Ish-punonjësit kanë denoncuar se në dy ditët e fundit janë thirrur në Policinë e Tiranës, ku janë marrë në pyetje dhe u janë kontrolluar telefonat celularë për shkak të një kallëzimi të bërë nga Z.Peza për “prishje imazhi”.

Pyetja e punonjësve dhe kontrolli i aparateve celularë është një akt i rëndë që synon frikësimin, intimidimin dhe heshtjen e tyre nën sfondin kur këta të fundit, kanë folur hapur për shkarkimet masive dhe të padrejta të Alfred Pezës.

AGSH i kërkon në mënyrë urgjente Policisë së Shtetit që të ndërpresë këtë praktikë abuzive dhe të sqarojë menjëherë rrethant e ngjarjes.

AGSH kërkon nga z. Peza të tërhiqet në mënyrë të menjëhershme nga këto praktika që synojnë frikësimin e ish-punonjësve të shkarkuar.

Ne jemi duke e ndjekur nga afër këtë situatë dhe do të mbajmë të informuar edhe organizatat partnere ndërkombëtare.