Gazeta RD
Lideri i opozitës, Sali Berisha ka paralajmëruar se ekzistenca si opozitë e vërtetë është në provë, për t’u vërtetuar shqiptarëve përmbushjen e misionit të saj për çlirimin e vendit nga diktatura.
Nga tubimi qytetar pranë banesës së tij, Berisha tha nuk duhet të qëndrohohet më në opozitë, për të firmosur vjedhjen e radhës së mandateve nga Rama. Kushtrimi i liderit historik të së djathtës shqiptare, Sali Berisha për qytetarët ishte përballja siç tha ai, dhëmb për dhëmb me diktatorin Rama.
“Miqtë e mi, të dashur demokratë e demokratë, në provë jemi ne.
Në provë është ekzistenca jonë si opozitë e vërtetë dhe jo fasadë.
Në provë është PD si parti e veprimit të pandalshëm.
Në provë është opozita, janë opozitarët si burra dhe gra, djem dhe vajza, guximtarë, të vendosur. Njerëz të sakrificës që do përmbushin misionin e tyre të çlirimit të vendit nga diktatura.
Studentët e Bangladeshit përzunë sot kryeministren e tyre kriminele sepse i diskriminonte ata.
Sepse kishte krijuar edhe ajo si Edi Rama një elitë shushunjë, që i vidhte çdo sekondë, çdo minutë, çdo ditë qytetarët e varfër të Bangladeshit. Që u vidhte votën, që u merrte lirinë.
Miq, Himara duhet të jetë thirrja për çdo qytetar shqiptar.
Demokrate e demokratë, kemi bërë rrugë të vështirë, por provën e madhe tani e kemi.
Prova e vërtetë tani është para nesh.
Do qëndrojmë ne opozitë për të firmosur vjedhjen e radhës të mandateve.
Do të qëndrojmë ne opozitë për të firmosur mandatin e katërt mbi krimin elektoral të Edi Ramës, apo do përballemi dhëmb për dhëmb, fyt për fyt.
Apo do përballemi për liri dhe dinjitet?
A do i përgjigjemi ne instinktit tonë?
A do i përgjigjemi ne himnit tonë?
A do përmbushim ne misionin historik të përmbysjes së diktaturës të bazuar në aleancën me krimin, vjedhjen e qytetarëve, drogën.
Nuk ka mision më të shenjtë se ky për shqiptarët”, tha Berisha.
