Gazeta RD
Biznesmeni Ilir Rrapaj, i cili është një prej përfituesve të koncesionit abuziv të sterilizimit ka mohuar miqësinë dhe njohjen e hershme me zv.ministrin Klodjan Rrjepaj, ndryshe nga çfarë pretendohet në dosjen e SPAK.
Në dëshminë e dhënë për komisionin hetimor parlamentar të hetimit të koncesioneve në shëndetësi, Rrapaj deklaroi se Rrjepajn e njeh vetëm që prej Gushtit të vitit të kaluar kur u arrestuan, duke qenë se tashmë jetojnë në të njëjtën rezidencë, duke iu referuar burgut.
Rrapaj deklaroi se Rjepajn e ka takuar për herë të parë në një aktivitet të organizuar nga Qeveria e Ramës në Pallatin e Kongreseve, por sërish këmbënguli se nuk ka patur miqësi me të apo të kenë folur për koncesionin në fjalë.
Marrja në pyetje nga kryetarja e komisionit Albana Vokshi
Albana Vokshi: A njihni Klodian Rrjepaj?
Biznesmeni Ilir Rrapaj: Deri në gusht të vitit 2023, kisha dijeni se kush ishte dhe çfarë ishte. Tani kemi 15 muaj në të njëjtën rezidencë, mund të them se e njoh.
Albana Vokshi: Ishit apo nuk ishit miq.
Biznesmeni Ilir Rrapaj: Fjala mik ka një përkufizim të veçantë në kontekstin dhe konturet e shqiptarizmit, të jesh mik është diçka e rrallë ndërkohë që kam bindjen është termi më i abuzuar me dashje apo pa dashje, s’kam pasur mundësi dhe asnjë lloj njohje me këtë person.
Albana Vokshi: Pra nuk e njihnit nga afër?
Biznesmeni Ilir Rrapaj: Jo.
Avokati: Kanë pasur njohje se kanë qenë në të njëjtin vit akademik, por s’kanë qenë as shokë as miq.
Biznesmeni Ilir Rrapaj: Nuk e njoh, nuk e kam njohur në atë periudhë. Vijmë nga shkolla të ndryshme, nga i njëjti qytet, por nuk njihemi dhe e kam takuar pas 20 vitesh.
Albana Vokshi: Kur e keni takuar zotin Rrjepaj?
Biznesmeni Ilir Rrapaj: E kam takuar për herë të parë nga afër në një aktivitet publik të organizuar nga qeveria shqiptare në Pallatin e Kongreseve. Diku nga 2013 diçka e tillë. E kam takuar nëpërmjet personave të tjerë.
Albana Vokshi: A keni folur për koncesionin e sterilizimit?
Biznesmeni Ilir Rrapaj: Absolutisht jo.
Albana Vokshi: Si jeni vënë në dijeni për koncesionin e sterilizimit?
Biznesmeni Ilir Rrapaj: Jam vënë në dijeni nëpërmjet njërit prej ortakëve që në bashkëpunim me një ortak tjetër kishin vendosur të merrnin pjesë në garë.
Albana Vokshi: Nuk njiheshit, por përdornit terma fratelo.
Biznesmeni Ilir Rrapaj: Ne jemi nga Vlora.
Albana Vokshi: E njihnit Ilir Beqajn?
Biznesmeni Ilir Rrapaj: Kam njohjen kush ishte si personazh publik. Nuk kemi pasur miqësi.
Albana Vokshi: Nuk e keni ndihmuar ministrin të kurohej në një nga spitalet e Italisë?
Biznesmeni Ilir Rrapaj: Jo s’kam qenë, më vjen keq që s’kam qenë. Nuk kam lidhje
Albana Vokshi: Keni dijeni për një shtëpi që ka blerë Beqaj në Itali?
Biznesmeni Ilir Rrapaj: Çfarë dijenie duhet të kem? S’kam.
Çfarë thuhet në dosjen e SPAK për miqësinë Ilir Rrapaj-Klodjan Rrjepaj?
Më 2 nëntor 2021 në Universitetin e Mjekësisë është kryer këqyrja e dokumenteve të mbajtura për ndjekjen e studimeve nga shtetasi Klodian Rjepaj në këtë Universitet.
Nga këqyrja rezultoi se shtetasi Klodian Rjepaj ka ndjekur vitet akademike në vitet 1990-1998, të ndara në dy periudha. Në vitet 1990-1994 dhe më pas në vitin 1994-1995 nuk ka frekuentuar studimet, për vitin 1995-1996 ka dhe shënimin “përsërit vitin”. Edhe për vitin 1996-1997 nuk ka shënime në regjistër. Më pas rezulton se ky shtetas ka kryer studimet në vazhdim në vitet akademike 1996-1997, 1997-1998 kur dhe është diplomuar.
Në këto regjistra vërehet se ka ndjekur studimet akademike në mjekësi edhe shtetasi Ilir Rrapaj.
Në regjistrin 8 Mjekësi, ku ndodhet emri i shtetasit Klodian Rjepaj, dy rreshta mbi të është i shënuar emri i shtetasi Ilir Rrapaj, të cilët për vitet akademike 1991-1992, 1992- 1993, 1993-1994, kanë ndjekur bashkë vitet akademike. Për vitin akademik 1994-1995 ashtu si Klodian Rjepaj, edhe shtetasi Ilir Rrapaj nuk ka frekuentuar studimet.
Për vitin akademik 1995-1996 ashtu si Klodian Rjepaj edhe shtetasi Ilir Rrapaj ka shënimin “Përsërit vitin”.
Edhe për vitin akademik 1996-1997 nuk ka shënime në regjistër. Gjithashtu, në të njëjtin regjistër në “regjistrin 7”, ku ndodhet emri i shtetasit Ilir Rrapaj, vërehet emri i shtetasi A.LL. i cili ka përfunduar studimet në vitin akademik 1994-1995.
Shtetasi A.LL. rezulton të jetë Drejtor në kompaninë Koncesionare Sani Service që nga krijimi i saj.
Gjithashtu, ai është administrator i kompanisë “Gamaservice”, kompani e cila ka transaksione në shitjet e kryera nga Koncesionari Sani Service për periudhën Prill 2020-dhjetor 2021 në vlerën 116 966 534 lekë (referuar informacionit të marrë nga Drejtoria e Përgjithshme e Tatimeve). Nga përmbajtja e këtyre akteve rezulton se Ilir Rrapaj dhe Klodian Rjepaj kanë ndjekur bashkë studimet e larta në Fakultetin e Mjekësisë në Tiranë në vitet 1991-1994 (1995-1996 të dy nuk kanë frekuentuar studimet). Gjithashtu, këta të fundit kanë përfunduar studimet me shtetasin A. Ll.
Gjithashtu më 22 dhjetor 2021 është pyetur në cilësinë e personit që ka dijeni për veprën penale shtetasja D. N., e cila kur është pyetur lidhur me faktin nëse ka njohje me shtetasit Ilir Rrapaj dhe Klodian Rjepaj ka deklaruar se: “Klodianin e kam pasur shok gjatë kohës së ndjekjes së studimeve universitare në Universitetin e Mjekësisë në vitet 1990-1992. Më pas unë jam larguar nga Shqipëria dhe kam vazhduar studimet në vitin 1995. Në dijeninë time edhe Klodiani është larguar një vit në Greqi dhe ka lënë studimet e i është rikthyer përsëri më vonë. Gjithashtu kam punuar me Klodianin në Institutin e Shëndetit Publik në vitet 2008-2013, ku Klodiani ka qenë menaxher i programit kombëtar të HIV-AIDS.
Sa i përket njohjes me biznesmenin, D.N. ka deklaruar: Po e njoh Ilir Rrapajn pasi është nga Vlora dhe kemi qenë studentë bashkë në fakultet, Iliri ka qenë në një brez me mua dhe Klodianin.
