Gazeta RD
Ajola Xoxa, bashkëshortja e kryebashkiakut të Tiranës, Erion Veliaj ka bërë rekurs në Gjykatën e Lartë, ku kundërshton vendimet e Gjykatës së Posaçme dhe të Apelit, të cilat legjitimuan kontrollet e ushtruara me urdhër të SPAK në bizneset e saj.
Më konkretisht bëhet fjalë për kontrollet e ushtruar mëngjesin e 6 Dhjetorit nga oficerët e BKH-së në banesat e Arbër Veliajt dhe familjarëve të Ajola Xoxës, si dhe në zyrat e fondacionit “Harabel”.
Avokatët e Ajola Xoxës dhe Arbër Veliajt pretendonin që kontrollet ishin bërë në shkelje të ligjit procedurial për mungesë shkaku të ligjshëm, por gjyqtarja e Apelit Ilirjana Olldashi i rrëzoi pretendimet e tyre më 24 Dhjetor.
Kontrollet u ushtruan në lidhje me hetimin e nisur nga dy prokurorët Altin Dumani dhe Ols Dado ndaj kreut të Bashkisë së Tiranës, Erion Veliaj.
Sipas SPAK nga kallëzimi i bërë ndaj Veliajt ekzistojnë të dhëna konkrete për 4 akuza lidhur me këtë çështje. Më konkretisht, për veprat penale:
“Korrupsion pasiv i funksionarëve të lartë shtetërorë ose i të zgjedhurve vendorë”,
“Korrupsion aktiv i funksionarëve të lartë shtetërorë ose të zgjedhurve vendorë”,
“Pastrimi i produkteve të veprës penale ose veprimtarisë kriminale”,
“Refuzim për deklarim, mosdeklarim, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë, ose i çdo personi tjetër që ka detyrim ligjor për deklarim”.
SPAK ka indicie se Erion Veliaj dhe të afërmit e tij janë implikuar në skemat e përfitimit të parave në rrjetin e kompanive që ka në pronësi biznesmeni shqiptaro-belg Elman Abule.
Për çështjen në fjalë kanë dëshmuar në SPAK çifti Erion Veliaj-Ajola Xoxa, por dhe çifti Elman Abule Marisa Nito. Elman Abule dhe bashkëshortja e tij Marisa Nito, konsiderohen miq të afërm të familjes Veliaj, ku miqësia e tyre duket se është ndërthurur edhe përmes disa transaksione të dyshimta financiare, që çifti Abule ka bërë në adresë të llogarive bankare të Ajola Xoxës.
