Edi Rama në bashki, ose kthimi në vendin e krimit!

Nga Armir SHKURTI

Pas arrestimit të Veliajt, Edi Rama u rishfaq në bashkinë e Tiranës. Propaganda e rilindjes u përpoq ta shiste si një mbështetje për punonjësit e trembur të bashkisë. Apo si merak që punët në Tiranë të vazhdojnë me ritmet e Lalit.

Le të sqarojmë që në fillim diçka: që nga ardhja e Ramës e deri më sot bashkia e Tiranës ka funksionuar si trusti i betonit dhe jo si institucion që menaxhon njerëzit dhe përfaqëson hallet e të zgjedhurve.

Çdo e keqe në politikë vjen në emër të së mirës dhe flamurin e saj. Rama e filloi me prishjen e kioskave. U gëzua mileti! Më pas nisi trusti i betonit të zbatojë platformën e bërjes dhe pastrimit të parave, pa pyetur se kryeqyteti u bë i pajetueshëm, stresues, i papërballueshëm ekonomikisht, duke vrarë mënyrën e jetesës së banorëve të tij që kanë bazuar ekzistencën në punë dhe ekonomi formale.

Në këtë aferë aktor shumë i rëndësishëm është edhe Lulzim Basha. Më së paku, për moskallëzim krimi. Kur erdhi në krye të bashkisë, Luli gjeti plot shkelje, por zgjodhi të kyç gojën….

Kalojmë te Veliaj. Deklarata e tij kur kërkonte ti grabiste Dukës FSHF-në, se ” kemi koqe hekuri” lidhet pikërisht me hekurin dhe çimenton e trustit të betonit dhe mafian e pastrimit të parave të lidhur organikisht me të. Kjo kupolë ka nevojë për garanci, pas arrestimit të Veliajt. Çmimet çmendurisht të larta e të papërballueshme të apartamenteve, ndërkohë që në kryeqytet ka dhjetra mijë apartamente bosh si dhe niveli i ulët ekonomik i shqiptarit që s’ka fuqi ti blerë, janë dëshmi të flluskës ekonomike të trustit të betonit, me autorë të padiskutueshëm politikë Rama – Veliaj.

Prandaj Rama u kthye në vendin e krimit. Po! Vërtet pati qëllim të japë zemër. Por jo punonjësve: thjesht TRUSTIT TË BETONIT! Ata duan garanci për investimin e po ashtu, ata ta shkrijnë hekurin e koqeve nëse paratë e tyre treten. Ky është edhe motivi parësor i sulmit të Edit ndaj atij segmenti drejtësie që arrestoi Veliajn dhe mbrojtja e fuqishme për Lalin.

E fundit, por jo më e parëndësishmja: RAMA ËSHTË RREZIK PËR PRISHJEN E PROVAVE!!! Ardhja e tij e vazhdueshme në bashkinë e Tiranës, gjysmë tinëz, nuk mund të kalojë në heshtje! Me autoritetin politik që ka dhe në këndvështrimin e asaj që shkruajta më sipër, unë kam frikë se Rama ka gjithë mundësitë të prishë, fshehë dhe zhdukë prova të ortakut të tij të flluskës imobiliare në Tiranë.