Gazeta RD
Një ditë pasi dëshmoi në SPAK për dosjen “Veliaj”, Klotilda Bushka sot nuk ka qenë në krye të Komisionit të Ligjeve për ta drejtuar, por në vendin e saj ishte zëvendëskryetari, deputeti i PS, Plarent Ndreca.
Ky i fundit është në proces penal për abuzim me tenderat në kohën kur ishte Sekretar i Përgjithshëm në Ministrinë e Brendshme.
Ish-ministri Genc Pollo thotë se kjo lëvizje e socialiste është e shëmtuar, ndërsa u bën thirrje deputetëve të opozitës që të mos e lejojnë këtë farsë.
Pollo gjithashtu kërkon dorëheqen e Klotilda Bushkës nga posti i kryetares së Komisionit të Ligjeve.
“Kryetarja e Komisionit të Ligjeve nën hetim për “pengim të drejtësisë” nuk paraqitet në Kuvend të drejtojë mbledhjen e Komisionit por as nuk jep dorëheqje.
Në vend të saj Komisionin e drejton një deputet rilindist që është në proçes penal për abuzim me tenderat e Ministrisë së Brendshme.
Pamje e shëmtuar. Deputetët e opozitës duhet të protestojnë me të gjitha mjetet dhe të mos e lejojnë këtë farsë”, shkruan Pollo.
