Berisha: Vendi nuk mund të ketë opozitë të vërtetë pa rikthyer votën e lirë, çdo opsion është në tavolinë

Kryetari i Partisë Demokratike, Sali Berisha, tha se mbrojtja e votës së lirë është prioriteti kryesor i opozitës.

Ai theksoi se Shqipëria nuk mund të ketë opozitë të vërtetë pa rikthimin e votës së lirë. Berisha paralajmëroi se opozita nuk do të pajtohet kurrë me situatën aktuale, duke e konsideruar atë të papranueshme.

“Mbrojtja, lufta me të gjitha mjetet që shqiptarët të votojnë të lirë.

Ka vetëm një objekt tani, shqiptarët duhet të votojnë të lirë.

Opozitë të vërtetë pa rikthyer votën e lirë, vendi nuk mund të ketë.

Nuk mund të jetë opozitë e vërtetë ajo e cila pajtohet me këtë situatë.

Kurrë, kurrë! Sepse ajo shndërrohet, futet si satelit në një orbitë dhe është një opozitë e pavlerë.

Ndaj dhe opozita do mobilizojë të gjithë potencialet e saj t’u rikthejë shqiptarëve votën e lirë.

Kjo është e gjitha…

…Çdo opsion është në tavolinë, por në tërësi beteja në çdo front është opsioni më i pëlqyer”, tha Berisha.