Gazeta RD
Pas afro dy vitesh në arrest shtëpie, kreu i Departamentit të Mjedisit në PD, Jamarbër Malltezi, në një intervistë për News24, e ka cilësuar arrestimin e tij si një akt të motivuar politik dhe të panevojshëm nga pikëpamja ligjore e njerëzore.
“Në rastin tim nuk ekzistonte asnjë rrethanë e jashtëzakonshme që të justifikonte privimin e lirisë. Ishte një urdhër politik, i zbatuar përmes nënshtrimit të gjyqtarëve”, tha Malltezi, duke theksuar se ndëshkimi i tij kishte si synim goditjen e figurës politike të familjes së tij.
Ai denoncoi gjithashtu sekuestrimin e aseteve të tij: “Jam i vetmi person në Republikë që ditën e parë të arrestimit më janë sekuestruar të gjitha llogaritë bankare, mbi 70% e pronave, dhe më janë marrë të gjitha aksionet në tre kompani private. Më gjeni një bandit që i ka ndodhur gjysma e këtyre brenda një dite”.
Malltezi shtoi se ndaj tij ishte vendosur një garanci pasurore, të cilën e cilësoi si pasojë e “frikës së gjyqtarëve”. Ai mbrojti pronësinë e pasurive të tij, duke theksuar: “Po, kam prona, por kjo nuk është krim, është rezultat i punës time”.
Në një ton personal dhe reflektues, ai shprehu keqardhjen që nuk i ishte gjendur familjes gjatë kësaj periudhe të vështirë, por shtoi se e kishte përballuar sfidën me dinjitet.
