Gazeta RD
Nga Gent STRAZIMIRI
Vagabond,
Mos e përjashto nga policia këtë vagabondin e vogël, të paktën jo për këtë rast, se ky rast “u zgjidh”!
Një më shumë a një më pak si ky tek kjo “policia” e tek ky “shteti” yt, as ulin e as ngrenë gjë në kandar…
As mos ia dorëzo gjykatës për “drejtësi” se dhe “drejtësia u bë”… në spital!
U bë me një akt rrugaçëror, me karrige kokës, mu në vendngjarje, menjëherë, pa vonesë, madje me një “efektivitet” e përkrahje mbarëpopullore që rrallë herë më parë e ka patur… një akt rrugaçëror…
Në këtë “shtetin” ku i pari i qeverisë të tregon “Noc Rrokun” (?!) e, ngre gishtin e mesit në sy të fëmijëve, madje gjatë ceremonisë së ndezjes së dritave në pemën e Krishtlindjeve (?!), polici, “shteti”, normal që të shan me nënë e me motër, si në Theth, apo të rreh fëmijën që punon në pushimet e verës e nuk pushon, për të mbledhur para që të vazhdojë shkollën…
Ky është “shteti” yt, dhe nuk të bën fajde distancimi prej rastit të Vlorës, sado “jakobinist” të jetë ndëshkimi i premtuar…
Ky rrugaçi tjetër që të ka rrahur këtë vagabondin tënd “shtetëror”, është bërë heroi i njerëzve;
duam s’duam u ka dhënë njerëzve dhe shembullin se si “bëhet drejtësia” e gjehet e drejta me këtë “shtetin” që ke bërë, e që drejton ti…
Dua të them që po të vjen radha;
që atë që kam 12 vjet që s’po e bëj dot unë me votë, politikë, fjalime, e me betëjë në institucione, do e bëjë mileti vetë… siç di ai…
Se kur shteti, domethënë qeveria, parlamenti, policia, prokuroria, gjykata është në dorë të vagabondëve, “dialogu”, e kësisoj “drejtësia”, vendoset veç mes, e përmes rrugaçësh…
Është ai procesi që kur mbyllet me sukses, e quajnë “revolucion”… … dhe zakonisht me sukses mbyllet !!
