Berisha deklaron riorganizim dhe ripërtëritje në PD

Kreu i Partisë Demokratike, Sali Berisha, ka dhënë një deklaratë të fortë për mobilizimin e PD-së me nisjen e sesionit të ri parlamentar në shtator.

Ai theksoi se opozita do të ndërmarrë të gjithë hapat e nevojshëm për t’i rezistuar asaj që e cilësoi si “narkodiktaturë” dhe “narkoshtet”, duke u ripërtërirë dhe duke u riorganizuar.

“PD do ndërmarrë të gjithë hapat e nevojshëm për t’i rezistuar kësaj narkodiktature, këtij narkoshteti, duke u ripërtërirë, duke u riorganizuar”, u shpreh Berisha, duke paralajmëruar një fazë të re politike për opozitën.

Ai e krahasoi situatën aktuale me diktaturën komuniste, duke theksuar se sot nuk është më ideologjia marksiste-leniniste që sundon, por droga, të cilën e quajti “forcën misterioze lëvizëse të shoqërisë”. Berisha ngriti akuza të drejtpërdrejta për lidhje të krimit me pushtetin, duke përmendur emra të njohur të botës së krimit dhe shifrat e mëdha të trafikut të drogës.