Zbulohet pse Ronaldo bëri një vijë në formë “Z-je” në anën e kokës në Kupën e Botës në Brazil

Cristiano Ronaldo bëri një prerje flokësh të çuditshme në Botërorin e vitit 2014. Një vijë e theksuar anash kokës, si një Z. Shumë qeshën. Por pak e kuptuan.

Media bëri humor. Rrjetet sociale u mbushën me ironi. Por ajo prerje mbante një histori që nuk zinte vend në meme.

Mijëra kilometra larg, në fshatin e vogël Villaluenga de la Sagra, në Spanjë, një foshnjë vetëm 10 muajsh po luftonte me kohën. Quhej Erik Ortiz Cruz. Vuante nga displazia kortikale, një keqformim i rëndë i trurit që i shkaktonte deri në 30 kriza në ditë.

Një operacion mund t’i jepte Erikut një mundësi për jetë pa kriza. Por kushtonte shumë: 83.000 dollarë – shumë më tepër nga ç’mund të përballonte familja.

Në dëshpërim, familja vendosi të provojnë diçka të pabesueshme: i shkruan Cristiano Ronaldos, duke i kërkuar të dhurojë një fanellë dhe një palë këpucë për t’i nxjerrë në ankand.

Por Ronaldo bëri shumë më tepër. Pa hezitim, pagoi të gjithë shumën për operacionin. Pa zhurmë. Pa reklama. Vetëm e bëri.

Por donte të linte edhe diçka tjetër.

Gjatë Kupës së Botës në Brazil, një vijë në formë “Z-je” u shfaq në anën e kokës së tij. Ishte simboli i plagës që Erik do të kishte në kokë pas operacionit. Ndërsa bota bënte shaka, Cristiano mbante në heshtje simbolin e një jete që kishte ndihmuar të shpëtonte.

Operacioni u realizua. Erik iu nënshtrua ndërhyrjes, doli nga spitali dhe nisi një jetë të re, me më shumë shpresë.

Ajo prerje flokësh nuk ishte për modë. Ishte për dhembshuri. Ishte për të parë dikë që bota nuk e shihte.