Gazeta RD
Presidentja e Kosovës, Vjosa Osmani, dhe bashkëshorti i saj, Prindon Sadriu, janë takuar me Presidentin e Shteteve të Bashkuara të Amerikës, Donald Trump, dhe Zonjën e Parë, Melania Trump, gjatë qëndrimit të tyre në Nju Jork.
Presidentja Osmani ka bërë të ditur se biseda me Presidentin Trump ishte e gjatë dhe përmbajtësore.
“Faleminderit Presidentit Trump për interesimin e veçantë që tregoi për rolin e pazëvendësueshëm të Amerikës në Kosovë dhe në rajonin tonë, si dhe për angazhimin e tij të palodhshëm për paqe,” shkroi Osmani në një postim në rrjetet sociale.
Ajo theksoi gjithashtu se marrëdhëniet me SHBA-të mbeten thelbësore për shtetin e Kosovës.
“Miqësia dhe aleanca me Shtetet e Bashkuara mbetet boshti i pathyeshëm. Kosova do të jetë gjithmonë në anën e demokracisë, lirisë dhe partneritetit me SHBA-të, sepse pikërisht aty rreh zemra e lirisë sonë,” shkroi Osmani, duke shtuar se “takimi vjen në një kohë kur liderë të ndryshëm botërorë ndodhen në Nju Jork për sesionin e radhës të Asamblesë së Përgjithshme të Kombeve të Bashkuara”, theksoi Osmani.
