Gazeta RD
Ish-ministri i Drejtësisë, Ylli Manjani ka reaguar në lidhje me dekretin e presidentit Bajram Begaj, i cili shpalli datën për zgjedhjet e pjesshme lokale në 6 Bashki.
Në dekretin e Begajt janë përfshirë edhe zgjedhjet në Tiranë, edhe pse Erion Veliaj ka kundërshtuar në Gjykatën Kushtetuese vendimin për shkarkimin e tij nga detyra e kryebashkiakut të Tiranës, i marrë nga Këshilli i Ministrave me 25 shtator.
Ylli Manjani shkruan se nëse dekretin e sotëm të Begajt do ta kishte nxjerrë Ilir Meta, ai do të ishte shkarkuar përmes një komisioni hetimor.
Reagimi i plotë i Manjanit
Nejse, ndoshta nuk vlen më asnjë sekond i harxhuar për të sqaruar Kushtetutën e vendit. Në fakt e kemi stër-sqaruar nenin 115 të saj në çdo okazion publik. Vetë Gjykata Kushtetuese në qëndrim publik dje ka thënë se “…vendimi i qeverisë është automatikisht i pezulluar”.
Por nëse dekretin e sotëm do ta kishte nxjerrë Ilir Meta, do ishte ngritur direkt komision hetimor dhe, do ishin çelur proçedurat për shkarkim. Besoj e kujtoni hetuesinë e Ulsiut në krye të komisionit kundër Metës.
Një gjë dua ta them qartë:
E kuptoj plotësisht nevojën politike të një Kryeministri apo të një partie që qeveris për të bërë zgjedhje blic. Është padyshim në të drejtën e tyre politike të kërkojnë e gjejnë zgjidhje. Ashtu siç edhe PD e Bashës ishte në të drejtën e vet të kërkonte shtyrje zgjedhjeve vendore të 2019-s. Unë vetë jam në favor të zgjedhjeve.
Por nuk kuptoj fare, po fare fare as Metën dje, kur lëshoi dekret për anulimin e zgjedhjeve e as Begajn sot që dekreton zgjedhje pa vend vakant.
Që të dy kanë dhunuar kushtetutën e shkruar!
Presidenti i Republikës është shtet, jo pushteti.
