Gazeta RD
Deputetja e PD, Ina Zhupa reagoi ashpër sot ndaj ministrit të Drejtësisë, Besfor Lamallari, duke e akuzuar se po bën avokatin e një vrasësi, pas ngjarjes tragjike të vrasjes së gjyqtarit të Apelit, Astrit Kalaja.
Në foltoren e Kuvendit, Zhupa kërkoi dorëheqjen e Lamallarit dhe të ministres së Brendshme, duke i akuzuar për mosgarantimin e jetës së qytetarëve dhe të aktorëve të sistemit të drejtësisë.
“Turp të vijë ty që sot këtu po bën avokatin e një vrasësi. Turp që si zv/ministër i Brendshëm nuk i je përgjigjur thirrjes për ndihmë që të ka bërë KLGJ. Sot nuk mban përgjegjësi vetëm për vrasjen e gjyqtarit që jepte vendim në emër të Republikës së Shqipërisë, por për sigurinë e gjithë qytetarëve,” tha Zhupa.
Deputetja kritikoi qeverinë për reformat në drejtësi dhe mungesën e sigurisë në gjykata:
“Kur policia e shtetit thotë nuk ka kapacitet për të mbrojtur një gjyqtar, çfarë kapaciteti keni ju për të siguruar jetën e qytetarëve? Ne mbajmë një minutë heshtje, por nuk do të thotë që Kuvendi duhet të heshtë. Të dy jeni skandalozë dhe duhet të jepni dorëheqjen!”, shtoi ajo.
