Çështja McGonigal, litari i varur në qafën e Ramës!

Nga Bujar Leskaj

Sot, Ne, anëtarët e Grupit Parlamentar të Partisë Demokratike depozituam kërkesën për ngritjen e një Komisioni Hetimor Parlamentar, për të verifikuar ligjshmërinë e veprimeve të zyrtarëve shqiptarë në raport me ish-agjentin e FBI-së, Charles F. McGonigal. Ky rast, i dokumentuar nga aktpaditë dhe dënimet në SHBA, lidhet me kontakte dhe marrëveshje të dyshimta që kanë prekur interesa ekonomike dhe politike në Shqipëri.

Edhe në legjislaturën e kaluar, të gjithë Ne, deputetët e Partisë Demokratike e kemi trajtuar këtë çështje në diskutimet parlamentare, duke theksuar rëndësinë e saj për transparencë e llogaridhënie.

Komisioni i propozuar do të shqyrtojë marrëdhëniet e zyrtarëve shqiptarë me McGonigal, duke mbledhur prova nga burime zyrtare dhe mediatike, për të vlerësuar nëse janë shkelur ligjet për konflikt interesi, transparencë dhe siguri kombëtare, si dhe për të rekomanduar masa që forcojnë integritetin institucional dhe mbrojnë interesin publik. Kërkesa mbështetet në nenin 77, pika 2 të Kushtetutës dhe nenin 25 të Rregullores së Kuvendit, si mjet i kontrollit parlamentar mbi veprimtarinë e zyrtarëve.

Ky Komision do të ketë rol të drejtpërdrejtë në zbardhjen e fakteve, duke siguruar përgjegjshmëri dhe transparencë, dhe do të shërbejë si instrument për të parandaluar situata të ngjashme në të ardhmen, duke mbrojtur interesin publik.