Gazeta RD
Kreu i Grupit Parlamentar të PD, Gazment Bardhi, deklaroi se opozita ka nisur zyrtarisht procedurat për shkarkimin e Presidentit të Republikës, Bajram Begaj.
I ftuar në emisionin “Opinion”, Bardhi akuzoi Presidentin për sjellje të njëanshme dhe shkelje të rënda të Kushtetutës.
“Kam njoftuar kërkesën për shkarkimin e presidentit Bajram Begaj. Rama po keqpërdor presidentin”, tha Bardhi në fillim të intervistës.
Sipas tij, Presidenti ka bërë ndërhyrje brutale në sistemin kushtetues, duke shkelur jo një, por shtatë herë Kushtetutën. Ai përmendi veçanërisht rastin e ndërhyrjes në mandatin e anëtarëve të Gjykatës Kushtetuese.
“Presidenti nuk zbaton Kushtetutën. Nuk mund të thotë presidenti se ‘unë e shkrij Gjykatën Kushtetuese’, nuk e pyes atë. Begaj ka bërë ndërhyrje brutale edhe në mandatet e Gjykatës Kushtetuese”, deklaroi ai.
Bardhi u ndal edhe te emërimi i ministres Diella, duke e cilësuar një tjetër akt të paprecedent nga ana e Presidentit.
“Presidenti nuk mund të përdorë termin ‘ministër’ për Diellën, sepse Diella është ministre sot në mënyrë antikushtetuese, pasi rrugën ia hapi dekreti i Begajt”, tha ai.
Një tjetër pikë që, sipas Bardhit, tregon shkeljen e rolit të Presidentit si garant i unitetit kombëtar, ishte mosreagimi ndaj pranisë së ambasadorëve në mitingjet e Partisë Socialiste.
“Në mitingjet e PS-së kanë qenë ambasadorë. Presidenti në këtë rast mund t’i jepte mesazh publik, duke u thënë ambasadorëve që të mos marrin pjesë në aktivitete politike”, u shpreh kreu i grupit parlamentar të PD-së.
Në listën e shkeljeve, Bardhi përfshiu edhe një ligj të miratuar nga mazhoranca që, sipas tij, cenonte hapësirat e opozitës në Kuvend. Ai theksoi se opozita i kishte kërkuar Presidentit ta kthente ligjin për rishqyrtim, por ky i fundit nuk veproi.
“Maxhoranca kaloi një ligj antikushtetues që ngushtonte hapësirën e opozitës në Kuvend dhe i kemi kërkuar presidentit që ta kthejë mbrapsht ligjin. Por Presidenti dekretoi ligjin dhe hodhi poshtë argumentet tona”, u shpreh Bardhi, duke shtuar se “Gjykata Kushtetuese na dha të drejtë”.
Një tjetër element që Bardhi solli në vëmendje ishte deklarimi i të ardhurave nga vetë Presidenti si mjek, çka, sipas tij, përbën shkelje të ligjit për konfliktin e interesit.
“Presidenti deklaron se merr të ardhura për konsulencën që jep si mjek. Kjo nuk lejohet me ligj”, tha ai.
Në fund, Bardhi ngriti dyshime mbi lidhjet familjare të Presidentit me përfitime publike, duke akuzuar djalin e tij për përfshirje në kompani që fitojnë tenderë në Shqipëri.
“Djali i presidentit jeton jashtë vendit dhe është i deklaruar si i punësuar në një klinikë private në Gjermani. Ndërkohë, punon edhe për kompani sigurimesh në Shqipëri. Kompania ku është punësuar ka fituar tendera. Ai merr 30 mijë euro në muaj dhe janë shumë”, deklaroi Bardhi.
Sipas tij, të gjitha këto tregojnë një përqendrim të pushtetit në duart e një njeriu të vetëm dhe përdorimin politik të Presidentit.
Gjithashtu, Bardhi deklaroi se Partia Demokratike do të depozitojë edhe një kallëzim penal ndaj kreut të shtetit për çështjen e pasurisë së tij.
Gazment Bardhi: Ne sulmojmë modelin që zgjedh Edi Rama për të qeverisur se nuk është Bajram Begaj. Bajram Begaj është një individ që e mori Edi Rama dhe e vuri president, pra në qindra intelektualë me integritet, profesionistë e me radhë, Edi Rama mori një njeri ekzaktësisht modelin që i dueht në institucionet shtetërore që mund të kontrollohet, një njeri që mund të akuzohet për afera korruptive, një njeri që mund të shantazhohet.
Blendi Fevziu: Pse niseni ju nga kjo dhe thoni, Presidenti i Republikës ka marrë edhe pëlqimin e SHBA-ve, ambasadës amerikane në Tiranë, ka qenë shef i Shtabit të Përgjithshëm të Ushtrisë, i dekretuar nga ish-presidenti Meta që ishte aleati juaj…
Gazment Bardhi: Imagjinoni, shefi i Shtabit të Forcave të Armatosura, paradite bënte shefin e Shtabit, pasdite bënte mjekun sepse kjo marrëdhënia me Acibadem është e shtrirë prej vitesh.
Blendi Fevziu: Duhet të jetë një gjë e verifikuar se unë nuk e di?
Gazment Bardhi: Jo, mjafton të hapni deklaratat janë zyrtare, janë publike, nuk është një fakt i fshehur.
Blendi Fevziu: Kjo tregon pozitivitet se dikush mund ta fshihte, mund t’i merrte ato lekë në dorë.
Gazment Bardhi: Jo, nuk mundet sepse është skemë klasike e deklarimit dhe justifikimit të pasurive se po të hapni pasurinë e presidentit, por kjo është një çështje që do të trajtohet me kallëzim penal ndaj tij…
Blendi Fevziu: Pse, presidenti ka shumë pasuri?
Gazment Bardhi: Presidenti është i vetmi njeri në këtë glob që vëllai i vet i blen shtëpi me para të fituara në emigracion, mami dhe babi blejnë një shtëpi dhe ia shesin presidentit për 2 milionë lekë të vjetra, është i vetmi njeri që duke punuar në ushtri ka privatizuar prona pa kundërshpërblim të ushtrisë, por këto janë histori që nuk kanë lidhje me Kushtetutën, prandaj ne nuk i kemi bërë publike.
Blendi Fevziu: Do t’i bëni?
Gazment Bardhi: Patjetër. Do të bëjmë kallëzim penal ndaj presidentit. A e dini ju që presidenti është sot pronar, nga një apartment 166 metër katrorë, sot është duke ndërtuar tri vila?
Blendi Fevziu: Ku e dini që po ndërton presidenti vila?
Gazment Bardhi: Ne jemi opozita e vendit që mbledhim informacione, verifikojmë informacione.
Blendi Fevziu: Gjysma e informacioneve janë false, janë kaotike, janë të shtuara.
Gazment Bardhi: Më thuaj një denoncim që unë kam bërë në këtë studio që ka dalë fals.
Blendi Fevziu: Pse keni targetuar presidentin?
Gazment Bardhi: Kemi targetuar Edi Ramën, nuk është Bajram Begaj.
Blendi Fevziu: Po i bini pragut që të dëgjojë dera…
Gazment Bardhi: Ne po i biem modelit korruptiv që Edi Rama çon në çdo institucion të këtij vendi.
