Balluku merret e pandehur, kontrolle në banesat e bashkëpunëtorëve të saj!

Prokuroria e Posaçme ka marrë të pandehur Belinda Ballukun, zëvendëskryeministren dhe Ministren e Energjisë dhe Infrastrukturës. Fletë-thirrja për Ballukun ka shkuar në adresë të Ministrisë së Energjisë dhe Infrastrukturës, mbi bazën e një shkrese që mban firmën e prokurorit të Posaçëm, Dritan Prençi.

SPAK nuk ka dhënë detaje mbi marrjen të pandehur të Ballukut, apo komunikimin e akuzës, zyrtarisht numrit dy të qeverisë shqiptare.

SPPAK, sipas informacioneve, kërkon nga Balluku që të paraqitet pranë këtij institucioni nën prezencën e një avokati. Nga ana tjetër SPAK po kryen kontrolle ndërkohë te disa bashkëpunëtorë të Belinda Ballukut.

Ndaj numrit dy të qeverisë Rama, ka një sërë kallëzimesh penale, përfshirë edhe atë të tunelit të Llogarasë ku vlera e tenderit që u fitua nga një kompani turke u rrit me mbi 50 mln euro.

Nuk dihet nëse zonja Balluku do t’i përgjigjet fletëthirrjes së SPAK dhe në këtë pozitë të re përballë drejtësisë do të vijojë apo jo të qëndrojë në postet qeveritare apo do zgjedhë të largohet me dorëheqje e ta zhvillojë betejën e saj pa mburojën e Partisë Socialiste.

Belinda Balluku e ushtron detyrën e zëvendëskryeministres që prej korrikut 2022. Ndërsa atë të Ministres së Infrastrukturës dhe Energjisë, që prej janarit të vitit 2019. Balluku ishte drejtuese politike e Qarkut Fier, ku në zgjedhjet e 11 majit fitoi 12 mandate.