Gazeta RD
Kryetari i PD, Sali Berisha ka pritur në një takim në selinë e PD raporterin e PE për Shqipërinë, Andreas Schieder dhe një grup gazetarësh gjermanë e austriakë.
Berisha shkruan se, gjatë një bisede të hapur e të ngrohtë, i njoha miqtë me opresionin që ushtrohet ndaj opozitës në Kuvend, moslejimin e interpelancave dhe ngritjen e komisioneve hetimore, një e drejtë kushtetuese e çdo opozite në çdo vend demokratik.
Postimi
Takim me raporterin e PE për Shqipërinë, z. Andreas Schieder dhe një grup gazetarësh gjermanë e austriakë.
Pata kënaqësinë të takoja dje në selinë e Partisë Demokratike, eurodeputetin Andreas Schieder, reporteri i Parlamentit Europian për Shqipërinë, anëtar i Komitetit të Stabilizim- Asociimit të PE me Shqipërinë, dhe një grup gazetarësh austriakë e gjermanë, që mbulojnë rajonin dhe Bashkimin Europian.
Gjatë një bisede të hapur e të ngrohtë, i njoha miqtë me opresionin që ushtrohet ndaj opozitës në Kuvend, moslejimin e interpelancave dhe ngritjen e komisioneve hetimore, një e drejtë kushtetuese e çdo opozite në çdo vend demokratik.
Theksova se kjo, ndër të tjera, përbën edhe dallimin mes një diktature totalitare dhe një autokracie, apo një narko-diktature, siç është Shqipëria nën Edi Ramën. Si ‘narkoshteti i parë’ dhe i vetëm në Europë, Shqipëria nuk cilësohet nga unë dhe as nga opozita, por është pjesë e një vargu hulumtimesh, reportazhesh dhe dokumentarësh në mediat austriake, gjermane, belge, italiane dhe franceze, duke filluar që nga viti 2017.
Shqipëria, nën qeverisjen e Ramës, është bërë një parajsë e narkotrafikut, pastrimit të parave të drogës në ndërtim dhe korrupsionit galopant.
U theksova miqve se, Partia Demokratike e ka të qartë dhe të pandërprerë vokacionin pro-perëndimor, dhe angazhimet eurotlantike janë në themel, jo vetëm të vizonit të saj që në zanafillë, në vitin 1990, por edhe shtylla mbi të cilat është qeverisur vendi nën drejtimin e saj.
Biseda ishte e hapur dhe me tematikë të gjerë.
