Skandali me buxhetin/ Do paguani 530 milionë euro taksa më shumë në 2026 për hareimin e Ramës

Deputetja e Partisë Demokratike, Jorida Tabaku, ka publikuar një video ku shpjegon se si qeveria po synon të marrë 530 milionë euro shtesë nga qytetarët shqiptarë, një barrë që sipas saj bie padrejtësisht mbi shumicën, ndërsa përfitimet përfundojnë tek një pakicë e privilegjuar.

Tabaku thekson se një e treta e të ardhurave të reja, vijnë nga rritja e pagës minimale, që çon automatikisht në rritje të kontributeve të sigurimeve shoqërore e shëndetësore të punonjësve dhe të shtresës së mesme.

Një e treta tjetër, sipas ligjvënëses, vjen drejtpërdrejt nga rritja e çmimeve. Të ardhurat nga TVSH, shpjegon ajo, janë rritur për shkak të inflacionit dhe jo për shkak të zhvillimit të ekonomisë, duke e bërë qytetarin e thjeshtë “sponsorin kryesor” të buxhetit të shtetit.

Ajo ngre pyetjen pse qeveria nuk prek me të njëjtën logjikë sektorët me fitime të mëdha, si hotelet me 5 yje apo kompanitë koncesionare, duke vënë në dukje se “barrën e ndajnë gjithmonë ata që punojnë dhe prodhojnë, ndërsa privilegjet mbeten të njëjtëve”.

 

“Buxheti i shtetit merr 530 milionë euro nga xhepat e qytetarëve dhe i shpërndan sërish tek pakica”, deklaron Tabaku, duke theksuar se bujqësia, arsimi dhe sektorët kryesorë të zhvillimit mbeten të nënfinancuar.

 

Mesazhi i saj është i qartë:

“Buxheti i 2026-s nuk është buxheti i shumicës, por një buxhet që pasuron të njëjtët aktorë, ndërsa penalizon punonjësit, familjet dhe shtresën e mesme”.