Zi, heshtje dhe lule në klasën e 15-vjeçarit që u vra me thikë në Durrës

Në klasën e 15-vjeçarit në Durrës, i cili ndërroi jetë një ditë më parë në spital si pasojë e plagës së marrë nga goditja me thikë, sot mbizotëronin zija dhe heshtja.

Vendin ku ai ulej çdo ditë e zinte një tufë me lule, vendosur nga bashkëmoshatarët në shenjë nderimi.

Në dërrasën e zezë të klasës, shokët dhe shoqet kishin shkruar disa fjalë prekëse për të, duke dëshmuar dhimbjen e thellë që humbja e tij ka lënë në komunitetin shkollor.

15 vjeçari ndërroi jetë ditën e djeshme. Adoleshenti kishte mbetur i plagosur në zemër pas një debati banal që nisi në rrjetet sociale, ndërsa u sulmua me thikë nga një moshatar i tij pranë shkollës “Dom Nikollë Kaçorri”.

Ngjarja ndodhi në rrugën “Laguna e Karavastasë” në zonën e ish-Kënetës në Durrës, ku pas zënkës në rrjetet sociale adoleshentët kanë lënë takim me njëri-tjetrin me pretendimin për t’u sqaruar.

Mësohet se dy adoleshentët kanë shkuar në vendin e takimit bashkë me shokë të tjerë dhe pas debateve me tone të ashpra janë përleshur fizikisht mes tyre, si dhe kanë përdorur sende të forta.

Gjatë konfliktit 14-vjeçari me inicialet M.K., qëlloi 4 herë me thikë 15-vjeçarin.